Carina
Diedericks-Hugo
 
Junie 2011


skrywers

storiemakers


 

 

Carina Diedericks-Hugo deel haar huis met haar man, 'n vriendelike spook en twee gemmerkatte, Leipoldt en Langenhoven. Sy onthou haar dae as die Swart Kat en droom om op tagtig die tango te dans.

Ek is op 11 Maart 1977 in Johannesburg gebore as die jongste (en amperse laatlammetjie) van drie kinders. Ek het twee ouers broers, Christaan en Gerhard, wat gelukkig nou nie meer dit hulle grootste plesier vind om hulle suster te terg nie! Ek het begin skoolgaan in Roodepoort by die Laerskool Horison. Ek kan nie veel onthou van graad een nie behalwe dat ek steeds deur my ma gedwing was om ballet te neem, ek regtig nie vinnig kon hardloop nie, daar elke pouse oliebolle vir 50c verkoop is en ons skoolklere 'n baie lelike bruin was.

Ons is na Pretoria waar ons vir vier jaar gebly het. Dit was die wonderlikste jare ooit en ek hou steeds vol dat Pretoria 'n great plek is om in groot te word. Ons het in Waterkloofrif gebly en ek was in Laerskool Anton van Wouw. Ek het woes geswem en koor gesing, nou en dan klavierles geneem, was 'n baie goeie Voortrekker (ek kan steeds vinniger 'n vlag hys en stryk as enigiemand wat ek ken) en het nogal van ons skooluniforms gehou. Ek was veral in my noppies dat ons kaalvoet kon skool toe gaan. Ek onthou Pretoria veral as die plek waar ek regtig ernstig begin lees het. Ons het aan die groot biblioteek in die stad behoort waar ek deur al die boeke gedraf het en ek was lid van die Daan Retief Boekklub. Elke maand het 'n pakkie gekom met 'n boek, 'n Japsnoetboekie ('n tipe nie-fiksie boek) en 'n aktiwiteitsboekie. My broers het ook al die jare aan die klub behoort wat beteken het dat ek eintlik drie keer soveel boeke gekry het as enige ander van my maats! My gunstelingboeke was die Swart Kat-reeks van Chris Sassner. (My ander gunstelingboeke was die Maasdorpreeks en Nancy Drew.) Ek het 'n Swart Kat-uniform gehad en het met my BMX deur die strate gery en avontuur gesoek (wat ek natuurlik nie gekry het nie) en toe maar bly lees en begin perdry.


Aan die begin van graad ses het ons Kaapstad toe getrek waar ek eers nie baie gelukkig was nie. Ek was in die Laerskool Groote Schuur waar almal gedink het ek is vreemd omdat ek praat van "my mo en my po". Ek was wel baie bly dat ons so naby aan die see was en ek baie meer perd kon ry as in Pretoria. Ons het aanvanklik by die see gebly, maar het later Constantia toe getrek. Al die bure het perde gehad behalwe ons en ek kon nie glo dat ons buurt nie straatligte het nie. Maar dit was wonderlik, want ons huis was so naby aan Duiwelspiek dat ek soms vir Van Hunks moes gil om maar stadig te gaan met sy pyp.


As ek my lewe kon oorhê, sou ek begin het as 'n tiener, want ek het die verveligste tienerjare gehad. Ek was vreeslik soet en voorbeeldig en my onderwysers by Herschel School ('n private meisieskool in Claremont) sê nou nog ek bly hulle gunsteling. Ek was nooit 'n rebel nie - ek het altyd my huiswerk gedoen, was onderhoofmeisie, het nie te laat uitgebly nie en het selfs hokkie gespeel (selfs al het ek nie daarvan gehou nie). Ek was wel mal oor waterpolo en in graad elf is ek gekies as uitruilstudent na Amerika waar ek skoolgegaan het by Brooks School naby Boston. Ek en die meisie wat saam met my was, het daarna vir ses weke deur Amerika gebackpack wat wonderlik was. Ons het van Boston via Cape Cod, Washington, Altanta en Orlando tot in Miami gereis, New Orleans, oor die breedte van land na die Grand Canyon, Dallas en Las Vegas, gaan sterre kyk in Los Angeles, gesurf in San Diego en San Francisco en weer die pad noord gevat na Seattle. Dit het hopeloos te veel daar gereën en ons het weer oos beweeg, vinnig gaan kyk na die Niagra Falls en uiteindelik 'n baie lank ruk in New York gebly.


Na skool is ek na die Universiteit van Stellenbosch waar vyf dinge gebeur het: ek het fantastiese vriende gemaak, ek het uitgevind ek wil skryf, ek het die wondere van witwyn ontdek, ek het my droomman ontmoet en ek het 'n BA (Internasionale Studies), Afrikaans en Nederlands Honneurs cum laude en MPhil (Joernalistiek) gekry. Vandag is ek waansinnig gelukkig getroud met my droomman, Daniel Hugo. Ons bly in die mooie Stellenbosch saam met vyf katte en elke wintersaand maak ons vuur in ons kaggel. Ek en Daniel is mal oor restaurante en ons eet baie uit. Ons gaan kruip soms naweke in Greyton weg en vakansies verken ons vreemde plekke met name soos Ljubljana. Ons forel-en-sjampanje-partytjies is legendaries en ek is geneig om tot drie films na mekaar te gaan kyk.

Ons bly in die mooie Stellenbosch saam met drie katte en elke wintersaand maak ons vuur in ons kaggel. Ek en Daniel is mal oor restaurante en ons eet baie uit. Ons gaan kruip soms naweke in Greyton weg en vakansies verken ons vreemde plekke met name soos Ljubljana. Ons forel-en-sjampanje-partytjies en braaie is legendaries en ek is geneig om tot drie films na mekaar te gaan kyk.

Ek werk voltyds as skrywer, resensent en onafhanklike uitgewerskonsultant. Ek hou van my werk omdat ek die hele dag met my neus in 'n boek kan sit sonder dat iemand dink ek is besig om lyf weg te steek. Ek tree baie by skole op wat die gunstelingdeel van my werk is, want ek dink kinders is wonderlik.

Op my tagtigste verjaarsdag wil ek die tango dans, Veuve Clicquot drink, sushi eet en dink aan wat my gunsteling skrywer, André P. Brink gesê het: "Only by dreaming and writing the impossible can life be made possible once again."

Publikasies:

  • 2010 – Die Groenmambas en Shaka se spies (MML, Kaapstad)
  • 2009 – thomas@geraamte.net (Lapa, Pretoria)
  • 2008 - Die verdrinking van Josua van Eden (Umuzi, Kaapstad)
  • 2007 - thomas@aksie.net (Lapa, Pretoria)
  • 2005 - thomas@nagmerrie.net (Lapa, Pretoria)
  • 2005 - Operasie Miaau (Human & Rousseau, Kaapstad)
  • 2004 - thomas@sms.net (Lapa, Pretoria)
  • 2003 - Koning Henry (Tafelberg, Kaapstad)
  • 2003 - thomas@aqua.net (Lapa, Pretoria)
  • 2002 - thomas@skerpioen.net (Lapa, Pretoria)
  • 2001 - Oogkontak (Contentlot, Kaapstad)


    Pryse:

  • 2011 – Naaswenner: Lapa Jeugromankompetisie
  • 2010 – Naaswenner: MML Kinderboekkompetisie
  • 2008 - ATKV-Kinderboekprys vir thomas@aksie.net.
  • 2007 - ATKV-Kinderboekprys vir thomas@nagmerrie.net.
  • 2007 - ATKV-Kinderboekprys vir Operasie Miaau.
  • 2006 - ATKV-Kinderboekprys vir thomas@sms.net.
  • 2005 - ATKV-Kinderboekprys vir Koning Henry.
(Inligting verskaf deur Carina Diedericks-Hugo, Desember 2001.
Aangepas Maart 2004; Aangepas November 2008; Junie 2011.)

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.

Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2011