Hoofstuk 2

Petri haal sy hande van die sleutelbord af. Iets pla. Bianca moes al lankal by die huis gewees het …
Hy bestudeer die skerm voor hom. 'n Sin wat in neongroen gloei, trek sy aandag: Riglyne vir hoofstuk 2. Hy kies dit.
'n Skermpie verskyn in die een hoek. Dis soos 'n rolprent wat afspeel: Bianca kom by sy kamer in. Sy raak aan die muis by sy rekenaar. Skielik gaan al die ligte uit. Die skerm begin gloei en die volgende oomblik verdwyn sy, deur die skerm! Bianca sit binne-in 'n webwerf: www.mafia.com.
Petri bewe van kop tot tone. Vervaard begin hy tik.
Die rekenaar kry weer lewe. Woordeloos kyk Petri hoe die muis vanself begin beweeg. Hy gril hom morsdood. Een van die sinne wat hy getik het, word geonderstreep. Ná hy die formule klaar ingetik het, begin die rekenaar bewe.
Dan kry Petri 'n snaakse gevoel, byna asof hy in 'n miljoen stukkies opgebreek word en in die lug dryf.
"Oef!" Hy maak hard met moeder aarde kennis. Half bedwelmd kom hy orent. Goeie genade! Aan sy regterkant loop daar 'n glasmuur. Hy kan sy kamer deur die glas sien ... Hy is binne-in die rekenaar!
Kalm bly. Dis tog wat hy ingetik het. Hy kyk om hom heen. Oral staan hoë geboue. Die lug is 'n snaakse grys en hy kan geen teken van son sien nie. Bianca is hier êrens. Hy weet dit.
Hy staan nog so, toe 'n swart motor langs hom stilhou. 'n Man in 'n swart pak spring uit. Hy het 'n sonbril op en het 'n geweer in die hand.
"You, boy!" sê hy en wink Petri nader.
"Oor my dooie liggaam!" roep Petri uit.
"Don't you understand me? Come here."
Petri staan vasgenael en kyk hoe die man naderstap. "Where is it?" vra die man in sy gesig. Sy asem ruik na sigarette.
Dan tref iets die man met 'n vreeslike vaart. Hy verloor sy balans en slaan neer. Iemand gryp Petri aan sy kraag en sleep hom saam.
Eers 'n paar blokke verder kom hy agter wie dit is. "Bianca!"
"Bly stil en hardloop, Petri. As hulle ons nou kry, is ons so goed as dood!" In die hardloop verduidelik sy: "Dis die mafia. Hulle soek ons bloed."
"Wag nou. Die mafia? Ons bloed? Wat máák ons hier?"
Sy tweelingsuster hyg na haar asem. "Dis jou simpel rekenaar se skuld. Maak leeg jou sakke."
Hy frons, maar gehoorsaam. Tien pakkies wit poeier val uit. "Wat? Hoe op aarde -"
"Dis dwelms, boetie. Jy het dit so ingetik."
"Ek het nie!"
"Jy het ingetik: Petri gaan haal Bianca in die webwerf, maar daar loop hulle hulle in groot moeilikheid vas. Gelukkig weet hulle hoe om uit te kom. Jy het so min detail gegee, die rekenaar het self besluit wat ons 'moeilikheid' gaan wees." Sy staan hom hande op die heup en aankyk. "Kom. Ons moet wegkruip."
"Jammer," sê hy. "Ek het nie gedink nie." "Jammer gaan ons nêrens kry nie. Ek sal jou later alles vertel. Nou moet ons eers …"
Daar is die gebrul van 'n enjin. Dis die swart motor en dit skree tot stilstand langs hulle. Die man spring uit. "Now you are both dead meat," grinnik hy. Wat het hy in sy hand - 'n spuitnaald?