Eendag lank gelede...
sprokies wat almal moet ken

Eendag was daar. Leoni Hofmeyr (smst.) Human & Rousseau, 1993.

Van die bekendste en mees geliefde sprokies uit die verhaleskat van die wêreld, vernuftige berymings en ander plesierige stories in 'n mooi versorgde, maklik hanteerbare boek.

Goue lint, my storie begint. Linda Rode (smst.) Tafelberg, 1985.

Goed versorg en pragtig geïllustreer is hierdie versameling oorvertellings van bekende sprokies en van Suid-Afrikaanse fantasie- en volksverhale.

Husse met ore. Tafelberg, 1993.

Verhale van oor die hele wêreld, puik vertaal. Die stories is kort en die druk redelik groot - geskik vir voorlees en selflees.

Die mooiste Afrikaanse sprokies. Human & Rousseau, 1993.

Van die bekendste en mooiste Afrikaanse sprokies, in lewendige trant vertel. Elke verhaal word aangevul met verbeeldingryke illustrasies.

Towertyd. Tafelberg, 1992.

'n Aantreklik versorgde boek met vyf sprokies deur meesterskrywers soos De Maupassant, De Cervantes, Poesjkin en Andersen. Puik vertaal met pragtige volkeur-illustrasies.

Bibber-bibber-bang

Altwee asvaal geskrik. Oxford University Press, 1991.

'n Dogtertjie en 'n muisie kry op dieselfde oomblik lus vir 'n slaaptydhappie en loop mekaar in die kombuis raak - en skrik hulle altwee asvaal! Die ideale voorleesstorie voor slaaptyd.

En toe word mamma 'n monster. Joanna Harrison, Human & Rousseau, 1996.

Die twee stoute kleuters wat die huis so bemors, merk nie op dat aaklige groen groeisels aan hul ma begin groei nie . . . 'n Uiters vermaaklike verhaal met kostelike illustrasies.

Daar's 'n spook in my kas! Martie Preller, Human & Rousseau.

Bertus se goed verdwyn en hy probeer sy ma oortuig dat dit 'n spook is. Dalk moet hy die spook tromp-op loop. Die genotvolle verhaaltjie word in prettige rymvorm vertel.

Gee my 'n drukkie -
stories oor myself en mense om my

So graag. Trish Cooke, Tafelberg, 1995.

Elkeen wat kom kuier, wil die baba so graag druk en soen en opeet en karnuffel. Pragtige uitbundige illustrasies help om 'n gevoel van teerheid en warme geborgenheid oor te dra.

Mamma het 'n eier gelê. Babette Cole, Human & Rousseau, 1993.

Die tweeling se ma en pa besluit dis tyd om hulle te leer waar babas vandaan kom. Maar, ai, toe weet die tweeling meer as ma en pa! Heerlik vermaaklik met skreeusnaakse illustrasies - die ideale boek vir mammas en pappas wat nog die gevreesde vraag moet antwoord.

Die seun op die strand. Niki Daly, Human & Rousseau, 1998.

'n Hartverwarmende boek oor 'n seuntjie se dag op die groot, wye strand. 'n Boek om voor te lees op 'n snikheet somerdag as julle nie by die strand kan uitkom nie, of op 'n koue, kletsnat winterdag as julle nie by die strand wil uitkom nie.

Nie so vinnig nie, Songololo! Niki Daly, Human & Rousseau, 1985.

Malusi en sy ouma loop deur die stad se strate. "Kyk, Gogo," sê Malusi, "rooi tekkies!" En toe hy hulle uiteindelik aantrek, moet sy ouma net keer, want die nuwe rooi tekkies loop nou alte vinnig. 'n Eenvoudige verhaaltjie oor die mooi verhouding van 'n seuntjie en sy Gogo.

Net perfek. Rachelle Greeff. Human & Rousseau, 1999.

Oupa se ou skilpad, Goliat, gaan dood en skielik besef Bella dat Oupa ook nie vir ewig gaan lewe nie. 'n Sensitiewe onderwerp word met deernis benader. Die prettige illustrasies vertel self 'n eie storie.

My dik boek. Maretha Maartens, Tafelberg, 1982.

Wie wil dan nou nie sélf 'n lekker diiik boek kan deurlees nie! Die agt kort stories oor alledaagse ervarings in 'n seuntjie se lewe bly die ideale, immerbroen selfleesboek vir beginners.