Werfjoernaal
 
2005-03-01

werfjoernaal
argief



Prysgeld van R8 000 in landwye skryfwedstryd te wen

ALTESAAM R8 000 se prysgeld (R3 000 meer as verlede jaar) kan vanjaar gewen word in 'n landwye skryfwedstryd deur die Bloemfonteinse Skrywersvereniging gereël slegs vir volwassenes en hoërskoolleerlinge wat nog nie voorheen gepubliseer het nie.

Daar is vier wisseltrofeë vir skole op die spel. Boonop wen die skool wat die meeste inskrywings stuur, R1 000.

Wenners van alle pryse kan verder 'n slypskool vir ontluikende skrywers wat die Bloemfonteinse Skrywersvereniging in Augustus aanbied, gratis bywoon.

Deelnemers moet een of meer oorspronklike opstelle, vertellings, kortkortverhale of kortverhale in Afrikaans oor voorgeskrewe, interessante onderwerpe voor Vrydag 6 Mei 2005 indien. Inskrywings word volkome anoniem beoordeel.

Daar is drie afdelings:

  • 'n junior afdeling (gr. 8 en 9)
  • 'n senior afdeling (gr. 10 - 12) vir hoërskoolleerlinge
  • 'n ope afdeling vir volwassenes en leerlinge.

Inskrywings in die skole-afdelings moet hoogstens 1 000 woorde lank wees en in die ope afdeling hoogstens 2 500 woorde.

In elke afdeling is daar vier pryse, plus 'n aanmoedigingsprys vir 'n deelnemer wie se moedertaal nie Afrikaans is nie.

Al die bekroonde inskrywings sal in Inkvars 2005, 'n huishoudelike publikasie van die Bloemfonteinse Skrywersvereniging, gepubliseer word.

Die wedstryd word deur die Vrystaatse dagblad Volksblad geborg en word met die steun van die Nasionale Afrikaanse Letterkundige Museum en Navorsingsentrum (Naln) in Bloemfontein geadministreer.

Die wedstryd word sedert 1989 landwyd aangebied en het sedertdien gegroei tot die grootste in sy soort in die land.

Inskrywing

Alle inskrywings moet van 'n voorgeskrewe inskrywingsvorm vergesel wees.

Bel Stoffel Cilliers by (051) 436 8089 (alle ure) of
Cecilia van der Linde by (051) 444 0115 (alle ure)
om die vorm te kry.

Of besoek die webtuiste:
http://www.geocities.com/bsv_skrywers/skryfwedstryd.html

Mediabekendmaking oor landwye skryfwedstryd van Bloemfonteinse Skrywersvereniging deur voorsitter, mnr. Stoffel Cilliers, op 24 Februarie 2005

 

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.
Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2005