Sanlam en Tafelberg-Uitgewers het so pas die name van die finaliste in die Sanlam-prys vir Jeuglektuur 2005 bekend gemaak.

Die finaliste in die kategorie vir Afrikaanse jeugromans is François Bloemhof, Annerie Britz, Naomi Meyer, Derick van der Walt, Engela van Rooyen en Fanie Viljoen.

In die afdeling vir Engelse jeugromans is die finaliste Darrel Bristow-Bovey, John Coetzee, J.W. Hichens, Heather Lee-Graham, Janie Oosthuysen en Jenny Robson.

In die afdeling vir Nguni-tale is die finaliste Sabatha Sifundza, met 'n jeugverhaal in siSwati, en Dumisani Sibiya, met een in isiZulu, terwyl die finaliste in die afdeling vir Sotho-tale Kabelo Duncan Kgatea is, met 'n manuskrip in Setswana, en K.P.D. Maphalla, met een in Sesotho.

Die name van die wenners in die verskillende kategorieë word binnekort bekend gemaak, en die wenboeke sal in die loop van Augustus, September en Oktober vrygestel word by bekendstellings-geleenthede in Kaapstad en Johannesburg.

Die "tema" vir 2007 se Sanlam-prys vir Jeuglektuur is ook bekend gemaak: vir hierdie wedstryd soek die organiseerders naamlik 'n jeugverhaal waarin tegnologie 'n rol speel. Die sluitingsdatum sal later bekend gemaak word.