Werfjoernaal
 
2006-02-01

werfjoernaal
argief



Dis storietyd by Woordfees 2006

Die Woordfees (6- 12 Maart) se tema is vanjaar "Stories” en dié fokuspunt word goed omskryf deur Annatjie Melck van Muratie-wynlandgoed se wenslagspreuk: “Fluit-fluit, dis storietyd.”

In die meer as 80 produksies gaan stories van alle kleure en geure vertel word wat tot ’n wye spektrum feesgangers sal spreek. Die jaarlikse skrywers-hoogtepunt, die Skrywersgala, spog volgende jaar met voorste skrywers soos PG du Plessis, Elias P Nel, George Weideman, Abraham H de Vries, EKM Dido en Rachelle Greeff. Tydens dié multimedia-produksie, saamgestel deur Juanita Swanepoel, sal nie net die skrywers se stories feesgangers boei nie, maar vertel die musiek en kort dramatiserings hulle eie verhale.

Verder kan feesgangers hulle regkry vir verskeie kuiers om die vuur. By Dombeya vertel gesoute vertellers, soos Dirk van Schalkwyk, Basil Kivido en Arno van Zyl hulle staaltjies. Verder sit Francois Toerien, Bongi Mantswai en Lukhanyo Vuyo die eeu oue Xhosa-storievertelling om konkavure voort met hulle iintsomi Kwathi ke kaloku ngantsomi. (Hier volg nou ‘n sprokie). Na dié iintsomi volg ‘n Not So Open Mike waartydens verskeie skrywers en musikante hulle ding op die verhoog doen.

Wat die woordure en diskoerse betref (ondersteun deur die LW Hiemstra Trust), is daar onder andere Pumla Gobodo-Madikezele (skrywer van A Human Being Died that night) en Chris van der Merwe, beide dosente aan die Universiteit van Kaapstad, wat kom gesels oor die belang van stories en hoe dit nie net terapeuties is vir die individu nie, maar dat Suid-Afrikaners mekaar eers leer ken as hulle na mekaar se stories luister.

In samewerking met die US Departement Geskiedenis, sal verskeie kenners soos Albert Grundling, Karen Harris en Herman Giliomee debatteer oor die storie van ons geskiedenis en hoe mens dit interpreteer.

Natuurlik is die immergewilde Filosofie:Kafee weer op die spyskaart en gaan skrywers soos George Weideman, Herman Wasserman, Zandra Bezuidenhout en Jaco Botha met woorde baklei teen filosowe Johan Hattingh, Anton van Niekerk, Paul Cilliers, Vasti Roodt en Willie van der Merwe.

Die Distell-drama Imbumba (‘n KKNK, Aardklop en Oude Libertas-koproduksie) sluit by die feestema aan deur ‘n skatkis van stories te bied uit verskillende kulture waarin die ryke veelsydigheid verweef word met die polsende ritmes en musiek eie aan ons land. Anna-Mart van der Merwe, Gys de Villiers. Jolette Odendaal, Janine Neethling en Jill Middlekop is enkele kunstenaars wat hierin sal optree.

Daar is nog hope ander stukke waarna uitgesien kan word. In Saartjie Botha se onlangs bekroonde Verkeer, met Neels van Jaarsveld, Lorraine Burger en Mbulelo Grootboom, word die begrip “verkeer” op ‘n komiese manier ondersoek. Nóg ‘n hoogtepunt is Ysterasters, waarin die alledaagse lewens van vroue in ‘n haarsalon met stories en skinder uitgebeeld word. Nina Swart, Petro van den Heever, Ilse Schmidt, Martelize Kolver, Hilda van Lill en Elsabé Daneel is hierin te sien.

Aan topgehalte musiekproduksies is daar ook nie ‘n tekort nie. Amanda Strydom en Coenie de Villiers span kragte saam in ‘n spesiale produksie. Verder bied die Woordfees weer die Paartie innie Park-buitelugkonsert aan met kunstenaars soos Valiant Swart, Delta Blue, Rooibaardt, N2 en die Brasse vannie Kaap. Koos Kombuis en Rocco de Villiers kom maak ook ‘n draai, en dan is daar die Kayamandi Musiekfees (ondersteun deur Distell) wat aan plaaslike kunstenaars ‘n podium bied om hulle talent bekend te stel.

Ook Lize Beekman, Anna Davel, Laurinda Hofmeyr en Zamar kom doen die vroue-ding met musiek wat beloof om die gehoor mee te voer.

Vir die klassieke musiek-liefhebbers is daar onder andere die Afrikaanse kunsliedprogram met Zanne Stapelberg, André Howard en Hendrik Hofmeyr; asook besonderse uitvoerings deur onderskeidelik Marica Otto, Trio College en Helena Conradie.

In ‘n simposium oor kinder- en jeugliteratuur kom verskeie kenners gesels oor verskeie relevante aspekte soos ondermeer dié aspekte in ‘n verhaal wat boeke vir leerders gewild maak, hoe en wat die jeug graag lees en wat die uitdagings is van hedendaagse jeugskrywers.

Selfs vir die kleinspan is daar ‘n opwindende kinderfees waarin Koning Leeu en Liewe Heksie maar net enkele van die karakters is wat hulle opwagting maak.

Vir verdere inligting oor die volledige program:

Skakel Theo Kemp by 021-8083513
of stuur ‘n e-pos na fees@sun.ac.za.

Die program is op die Woordfees se nuwe webtuiste beskikbaar by www.litnet.co.za/woordfees

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.
Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2006