Die grootste opwinding van die pas afgelope KKNK het toe nie gekom van die produksies met die "groot" name nie, maar in die gedaante van 'n klein, wilde meisietjie met sproete en 'n slangetjie in haar woeste rooi hare ...

Die prenteboek Die avonture van Wilde Willemientjie was nie net die topverkoper in die Boekeparadys nie (twee besendings boeke is deur gretige kopers opgeraap en is binne 'n ommesientjie uitverkoop), maar die musiekverwerking van die teks is ook pas bekroon met 'n gesogte Kanna-toekenning as beste kinderproduksie van die KKNK 2006.

Die avonture van Wilde Willemientjie is 'n musikale kinderversdrama uit die hoogste rakke en het gespog met 'n sterbelaaide rolverdeling van jong, bekroonde akteurs. Dit is 'n energieke, vrolike, interaktiewe opvoering gemik op kinders van alle ouderdomme. (Kinders ouer as 60 is wel aangeraai om voor die vertoning deeglik uit te rus, aangesien die akteurs geen verantwoordelikheid aanvaar het vir algehele uitputting nie!)

Regie en musiekregie is gedoen deur Niël Rademan - hy speel ook klavier hierin. In die rolle is Lindi Smit (as ouma, Cassandra en die bose jagter), Deon van Zyl (as oupa, die skelm skurk en die gemsbok) en Burnese Cronjé (as die onweerstaanbare Willemientjie). Die stelontwerp is gedoen deur Jacolene de Haan.

"'n Heel andersoortige oorspronklike stuk is Die avonture van Wilde
Willemientjie, Riana Scheepers se nuwe kinderboek verwerk deur Niël Rademan, wat ook self die klavier daarin bespeel. Dit bied prettige vermaak vir kinders, en dis veral 'n verademing om na 'n kinderproduksie te kan kyk
waarin die natuur, musiek en die wye wêreld die botoon voer eerder as
selebriteite en TV-persoonlikhede. 'n Wonderlike manier om 'n boek bekend te stel!
Gerrit Brand - Die Burger

"Wilde Willemientjie is gróót pret. Kinders en ouers geniet hulle gate uit tydens hierdie energieke en uiters vermaaklike musikale versdrama".
Ingrid Lehmensich - Krit

"Wilde Willemientjie is die beste ding sedert Smarties en roomys!"
'n Leser

Persverklaring 7 April 2006