Van 14-19 Augustus is dit Afrikaansweek. Afrikaanssprekendes is in rep en roep. Afrikaners is plesierig en praterig en vol pret - en dit alles in Afrikaans.

Die hele feestelike Afrikaansweek skop af met die GRA-dag en dié wat weet, sal vertel dat die GRA die Genootskap vir Regte Afrikaners is wat 131 jaar gelede gestig is deur mense wat wou hê dat Afrikaans opgeskryf moes word. Dit was ’n groep manne wat vir die taal lief was en hulle kragte wou inspan om dit te bewaar en te laat voortleef. Manne wat sekerlik stom van verbasing sou wees oor die mate waarin die taal gegroei het en tans gebruik word.

Skole en organisasies wat omgee vir die taal doen landswyd hierdie week spesiale projekte. Konserte, take en voordragte word gelewer. Een skool hou ’n vasvra, ‘n ander ’n taaloggend, maar elke skool doen iets om die taal waarin die kinders leer en skryf en praat, te bevorder.

Iewers vergader ’n groep vriende om ’n pot sop, elkeen met ’n sjerrie in die hand. Mense lees vir mekaar voor uit boeke wat hulle as besondere letterkunde beskou, ander luister na hulle gunsteling Afrikaanse musiek. Dan is daar ook die grappe-aand. Ja, wat sou die Afrikaner sonder sy sin vir humor en kwota grappe maak.

Toe die agt manne van die Paarl 131 jaar gelede die Genootskap gestig het, het hulle iets geweet wat ons vandag ook weet. Afrikaans is hier om te bly. Afrikaans is lekker en vriendelik en vrolik.

En baie belangrik: op 14 Augustus word elke gesin in die land opgeroep om een Afrikaanse boek te koop. Een of twee of tweehonderd. Vir jou self of jou kind of jou vriend, of jou vriend se kind of jou kind se vriend. Hoe dit ookal sy, koop ‘n boek. Landswyd word ’n beroep gedoen op boekwinkels om op daardie dag ’n spesiale afslag op boeke te gee. Wordsworth, PNA, Protea Boekhuis, Die Boekehuis (Johannesburg), Boek Hoekie (Paarl) en Die Burger ondersteun hierdie inisiatief.

“Huisbiblioteke wat elke jaar aangroei is ’n belegging in lewenslange vriende. Dit is nie ’n luukse besitting nie, maar ’n lewensnoodsaaklikheid”, is die opinie van Henry Ward Beecher (1813-1887).