ATKV-Projekte bied in samewerking met die Provincie Antwerpen 'n kinderboekskryfskool vanaf 31 Maart tot 2 April 2008 aan. Gedurende hierdie skryfskool word aspirantskrywers geleer hoe om 'n kind of tiener se verbeelding aan te gryp. Drie dae lank word daar net kinder- en jeugliteratuur gepraat, geëet, gespeel en geskryf.

Die skryfkursus word met die medewerking van die ATKV-Skryfskool van die Noordwes-Universiteit aangebied. Die aanbieder is Dr. Franci Greyling van die Vakgroep Skryfkuns aan die Noordwes-Universiteit (Potchefstroomkampus). Die sprekers wat gaan optree sluit onder andere Jaco Jacobs, kinder- en jeugboekskrywer in. Jaco is pas met die C.P. Hoogenhout-toekenning bekroon vir sy jeugboek Wurms met Tamatiesous en ander Lawwe Rympies (Lapa-Uitgewers, 2007). Martie Preller, skrywer en skepper van die gewilde Babalela-boeke en Prof. Maritha Snyman, skrywer en kenner op die gebied van kinders se leesbehoeftes en -gewoontes gaan ook as sprekers optree.

Die totale koste van die skryfskool beloop R800.00 per persoon. Die skryfskool word aangebied by die ATKV se hoofkantoor in Randburg. Die inskrywingsvorm is beskikbaar op die ATKV-webwerf (www.atkv.org.za). Die sluitingsdatum vir inskrywings is Vrydag, 14 Maart 2008.

Navrae en onderhoude:

Jeanné Naudé
083 232 7276; 011 919 9088
jeannen@atkv.org.za

2008-02-07