Werfjoernaal
 
2008-07-11

werfjoernaal
argief



Bloemfonteinse skrywersvereniging se wenners 2008

Die bestuur van die Bloemfonteinse Skrywersvereniging (BSV) het pas die uitslae van sy jaarlikse landwye skryfwedstryd, Skrywers 2008, bekend gemaak.

Die wedstryd is deur Volksblad geborg en met steun van die Nasionale Afrikaanse Letterkundige Museum en Navorsingsentrum (Naln) geadministreer. R10 000 se pryse is vanjaar uitgeloof en vier wisseltrofeë vir skole was op die spel. Die afdelings is hierdie jaar effens aangepas en was as volg: skrywers wat nog nie voorheen skeppende kortprosa teen vergoeding gepubliseer het nie, (hoërskoolleerlinge en volwassenes); skrywers wat al voorheen teen vergoeding gepubliseer het en laastens, 'n ope afdeling vir poësie. Deelnemers kon opstelle, sketse, kortverhale, kortkortverhale en gedigte oor voorgeskrewe onderwerpe indien.

Vanjaar is 755 inskrywings uit alle dele van die land vir beoordeling soos volg voorgelê: junior afdeling 56, senior afdeling 232, ope afdeling (voorheen ongepubliseer) 94, ope afdeling (voorheen gepubliseer) 25 en poësie 358. Weer eens is bewys dat hierdie lank gevestigde wedstryd met die steun van Volksblad en Naln 'n baie belangrike bydrae lewer ter bevordering van Afrikaans, en ook om belangstelling in skryfwerk te stimuleer en sluimerende skryftalent te laat ontwikkel. Die wedstryd is tien jaar eers net in die Vrystaat aangebied en daarna, sedert 1989, landwyd. Dit het gegroei tot die grootste skryfwedstryd in sy soort in die land.

Die junior afdeling is deur 'n Vrystater gewen: Linki Scholtz is 'n gr 8-leerder aan die C & N Meisieskool Oranje in Bloemfontein. Die wisseltrofee vir die skool wat die meeste inskrywings gelewer het, is vanjaar weer deur die Hoërskool D.F. Malan in Bellville verower. Dié skool het altesaam 231 inskrywings ingestuur en ook twee pryse in die senior afdeling losgeslaan. 'n Hele paar inskrywings is uit die buiteland ontvang en daar was vanjaar weer belangstelling uit nie-Afrikaanssprekende geledere.

Al die bekroonde inskrywings sal in Inkvars 2008, 'n huishoudelike publikasie van die Bloemfonteinse Skrywersvereniging, gebundel word. Die bundel sal op Saterdag 16 Augustus 2008 uitgereik word, wanneer die geldpryse, sertifikate en trofeë op die BSV se jaarlikse Slypskool vir Ontluikende Skrywers by die Noorderbloem-aftreeoord in Bayswater, Bloemfontein, oorhandig word. Die baie bekende skrywer, Annelie Botes van die Oos-Kaap, lei die slypskool.

Inkvars 2008 kan teen R60 per eksemplaar (plus R5 vir posgeld) van die voorsitter van die BSV, me. Lalien Cilliers, bestel word. Die adres is Languedocstr 25, Bayswater, Bloemfontein, 9301 (tel. (51 436-2629, na ure). Ook vorige eksemplare van Inkvars (wat die betrokke jare se weninskrywings bevat) kan teen laer pryse bestel word.

Verdere besonderhede oor die wedstryd en die slypskool kan van die voorsitter, me. Lalien Cilliers, by (051) 436-2629 (na ure), of by me. Magda Janse van Rensburg, by (051) 446-1123 (na ure) verkry word.

Die bekroonde inskrywings in Skrywers 2008 is soos volg:

UITSLAE: SKRYWERS 2008

JUNIOR AFDELING (GR. 8 EN GR. 9)

1ste prys (R700): Linki Scholtz, Gr. 8, C & N Sekondêre Meisieskool Oranje, Bloemfontein

SENIOR AFDELING (GR. 10 - GR. 12)

1ste prys (R1000): Mari van Deventer, Gr 11, Hoërskool Langenhoven, Riversdal
2de prys (R550): Janneke Gerber, Gr 10, Hoërskool D.F. Malan, Bellville
3de prys (R350): Adriaan Odendaal, Gr. 12, Hoërskool D.F. Malan, Bellville
Eervol vermeld: Mari van Deventer, Gr. 11, Hoërskool Langenhoven, Riversdal
Eervol vermeld: Alida Nel, Gr. 11, Hoërskool Durbanville, Durbanville
Aanmoedigingsprys vir nie-Afrikaanssprekende (R250):
Siobhán Rickerts, Gr. 12 (Engelssprekend), Hoërskool De Kuilen, Kuilsriver

OPE AFDELING A (Nog nie voorheen gepubliseer teen vergoeding nie)

1ste prys (R1100): Mev. Antoinette Diedericks, Montagu
2de prys (R650): Mev. Ansie Botha, Christiana
3de prys (R450): Mnr. Riaan Raath, Senekal
Eervol vermeld: Mev. Gertruida du Buisson, Bloemfontein
Eervol vermeld: Mev. Jacolet van den Berg, Weltevredenpark

OPE AFDELING B (Voorheen gepubliseer teen vergoeding)

1ste prys (R1100): Mev. Elsa Engelbrecht, Bergbron
2de prys (R400): Mev. Magda van der Merwe, Klerksdorp
Eervol vermeld: Mev. Elsa Engelbrecht, Bergbron
Eervol vermeld: Mnr. Eben Germishuys, Magalieskruin

OPE AFDELING C - POËSIE

1ste prys (R1100): Mev. Magda van der Merwe, Klerksdorp
2de prys (R650): Mnr. Dave Lubbe, Bloemfontein
Eervol vermeld: Mev. Stefnie Muller, Bloemfontein
Eervol vermeld: Mev. Magda van der Merwe, Klerksdorp

TROFEë

HAUM-Literêr-trofee vir skool van wenner in Junior Afdeling: C & N Sekondêre Meisieskool Oranje, Bloemfontein
Olivier-wisseltrofee vir skool van wenner in Senior Afdeling: Hoërskool Langenhoven, Riversdal
Gerhard Beukes-wisseltrofee vir skool van algehele skolewenner: Hoërskool Langenhoven, Riversdal
Vrystaat-wisseltrofee vir skool met meeste inskrywings (plus R1 000): Hoërskool D.F. Malan, Bellville.

MEDIAVRYSTELLING DEUR BESTUURSLID, MEV. YOLANDé VAN HEERDEN, OP 17 JUNIE 2008

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.
Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2008