Werfjoernaal
 
2008-10

werfjoernaal
argief



Storieman - die nuwe uitgawe

In Junie 1984 is die Storieman-reeks van 30 boeke en 30 oudio-kasette op 'n kleuter- en kinderpartytjie in Leinster Hall, Leon Rousseau se 19de-eeuse huis in Weltevredenstraat, Tuine, Kaapstad, bekend gestel. Leinster Hall huisves vandag die Cape Town Club, asook die Leinster Hall Restaurant.

Iets meer as 24 jaar later, op 12 Oktober 2008, verskyn al 30 klankbane in die reeks vir die eerste maar ook vir die laaste keer op CD. Net 1000 stelle CD's is pas gepers, wat die reeks 'n versamelaarsitem maak.

Dié gaste by die party van 1984 wat nog in Kaapstad of omgewing is, is genooi na 'n klein vonkelwyn-ontbyt in Leinster Hall op 12 Oktober 2008.

Die buitelandse kopiereghouers van baie van die stof in Storieman (kantoor is in Londen, met beheer uit Singapoer) wil om onbekende redes nie meer publikasieregte verkoop nie. Leon Rousseau raai dat dit miskien verband hou met hul eie kopieregprobleme, aangesien honderde kopieregte vir die reeks byeengebring moes word.

Hy wonder ook of Storieman in die Afrikaanse boekewêreld nie dalk een van die top-verkopers ooit was nie. Die eerste druk van boek 1 (met oudiokasset) was destyds 35 000 eksemplare, en dit is minstens ses keer herdruk. Ook die 29 ander boeke in die reeks het baie goed gevaar en is dikwels herdruk.

Daar is geen vooruitsig dat Storieman ooit weer in sy huidige vorm sal verskyn nie.

Die prys per CD is R59, of R1770 vir al 30. Slegs volledige stelle word verkoop. Storieman-boeke wat nog beskikbaar is (van die 30 boeke is uit druk) word as pasella saam met die CD's gelewer. Aangesien van heelparty boeke minder as 1 000 eksemplare oor is, staan kopers wat gou bestel, die beste kans om die grootste deel van die boeke saam met die volledige stel CD's te bekom.

Die volledige Storieman-reeks

Bestel by:

Kontakersoon: Elsa Smit
Tel. 012 807 6279 (huis)
012 348 2480 (werk)
082 674 2782 (sel)
faks: 086 621 1248
e-pos: storieman@mweb.co.za
Posbus 74096, Lynnwoodrif 0040.
(Bankbesonderhede sal op versoek verskaf word).

Die volledige Storieman-reeks

Byskrif: Leon Rousseau, uitgewer van Storieman, saam met die jeugdige nasate van tien beroemde Storiemense op die trappe van sy huis, Leinster Hall, in die Tuine toe die Storeman-reeks in Junie 1984 bekend gestel is. Voor sit (van links) Willemien Brümmer, agterkleinkind van C.J. Langenhoven; Madeleine Gonin, kleindogter van D.J. Opperman; Deirdre Duminy, agterkleinkind van E.B. Grosskopf, Anna-Helise Collins, kleindogter van Etienne Leroux; Willem de Vries, seun van Braam de Vries, en Marié-Louise, Leon Rousseau se dogter. Agter staan (van links) Tyrone Bowman, kleinseun van Ingrid Jonker; Maria Human, kleindogter van N.P. van Wyk Louw; Rosa Louw, kleindogter van W.E.G. Louw, en Jesse Kramer, David Kramer se dogter.

Vier en twintig jaar later:
Van die tien by die partytjie van 1984 het ses al in die buiteland gewoon of gewerk. Vier is op die oomblik daar. Die ses wat in in Suid-Afrika is, woon almal in die Kaap en het almal die uitnodiging aanvaar. Hulle is Willemien Brümmer, redaksie BY, Willem de Vries, kunsredaksie Die Burger, Jesse Kramer pas terug uit Taiwan, Deirdre Pringle (geb. Duminy), finale jaar medies, Rosa Louw, Zoom Advertising, Marié-Louise Rousseau, nagredaksie, Die Burger.

 

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.

Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2009