Werfjoernaal
 
2009-04

werfjoernaal
argief



Groot skryfwedstryd met publikasiemoontlikhede

Die groot skryfwedstryd met groot prysgeld en publikasiemoontlikhede in Passi-tydskrif.

Voornemende skrywers sal moet opskud om R12 000 los te skryf in die jaarlikse landwye skryfwedstryd van die Bloemfonteinse Skrywersvereniging. Vorige wenners van die groot BSV-skryfwedstryd is deesdae bekroonde skrywers, soos Carina Diedericks-Hugo, Fanie Viljoen en Jaco Jacobs. Die sluitingsdatum is Vrydag 15 Mei 2009.

Die wedstryd word spesiaal gereël vir volwassenes en hoërskoolleerlinge wat nog nie voorheen kortprosa teen vergoeding gepubliseer het nie, sowel as diegene wat wel al voorheen teen vergoeding gepubliseer het. Deelnemers moet een of meer oorspronklike opstelle, vertellings, kortkortverhale, kortverhale of gedigte in Afrikaans oor voorgeskrewe, interessante onderwerpe indien. Inskrywings word anoniem beoordeel.

Benewens aantreklike geldpryse is daar ook vier wisseltrofeë vir skole op die spel. Boonop wen die skool wat die meeste inskrywings instuur, R1 000. Daar is vier afdelings: drie prosa-afdelings en een poësie-afdeling. Afdeling A is vir leerders (Juniors: graad 8 tot 9) en (Seniors: graad 10 tot 12), Afdeling B behels prosa vir volwasse skrywers wat nog nie voorheen gepubliseer het nie. Afdeling C is 'n ope afdeling vir skrywers wat wel al voorheen kortprosa teen vergoeding gepubliseer het. Afdeling D is 'n poësie-afdeling vir gepubliseerde en ongepubliseerde deelnemers.

Leerders wat aan Afdeling A deelneem, moet kortprosa van hoogstens 1 000 woorde voorlê; volwassenes wat aan die wedstryd deelneem se kortprosa mag hoogstens 2 500 woorde lank wees, en digters word beperk tot gedigte van hoogstens 40 versreëls lank.

Daar is aantreklike geldpryse in elke afdeling, asook 'n aanmoedigingsprys (ook 'n geldprys) in Afdeling A vir 'n deelnemer wie se moedertaal nie Afrikaans is nie.

Boonop kan wenners van alle pryse 'n slypskool vir ontluikende skrywers wat die Bloemfonteinse Skrywersvereniging in Augustus aanbied, gratis bywoon. Al die bekroonde inskrywings sal in Inkvars 2009, 'n huishoudelike publikasie van die Bloemfonteinse Skrywersvereniging, gepubliseer word. Daar is ook publikasiemoontlikhede vir wenverhale in die glanstydskrif, Passi.

Die wedstryd word met die steun van die Nasionale Afrikaanse Letterkundige Museum en Navorsingsentrum in Bloemfontein geadministreer. Die wedstryd word sedert 1989 landwyd aangebied en het sedertdien gegroei tot die grootste in sy soort in die land.

Alle inskrywings moet van 'n voorgeskrewe inskrywingsvorm vergesel wees.

Bel dadelik vir mev. Christa Jordaan by 051-5229155, of mnr. Kassie Joubert by 0822004340 om die vorm, wedstrydreëls en onderwerpe te bekom. Of kry dit by bloemsv@yahoo.com .

Mediabekendmaking oor landwye skryfwedstryd van Bloemfonteinse Skrywersvereniging deur die voorsitter, me. Corlietha Swart, op 15 Maart 2009

 

 

 

 


Voordeur en inhoud | Jong woordvrate | Ouer woordvrate | epos

STORIEWERF word aangebied saam met woordvrate en storiemakers
van alle soorte en groottes.

Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2009