Die voorsitter van die Bloemfonteinse Skrywersvereniging, Corlietha Swart, nooi voornemende skrywers om R12 000 los te skryf in die jaarlikse landwye skryfwedstryd van die Bloemfonteinse Skrywersvereniging. Vanjaar word die prysgeld geborg deur die Fakulteit Geesteswetenskappe van die Universiteit van die Vrystaat. Vorige wenners van die groot BSV-skryfwedstryd is deesdae bekroonde skrywers, soos Piet Steyn, Carina Stander, Carina Diedericks-Hugo, Fanie Viljoen en Jaco Jacobs! Die sluitingsdatum is Vrydag, 7 Mei 2010.

Die wedstryd word spesiaal gereël vir volwassenes en hoërskoolleerlinge wat nog nie voorheen kortprosa teen vergoeding gepubliseer het nie, sowel as diegene wat wel al voorheen teen vergoeding gepubliseer het. Deelnemers moet een of meer oorspronklike opstelle, vertellings, kortkortverhale, kortverhale of gedigte in Afrikaans oor voorgeskrewe, interessante onderwerpe indien. Inskrywings word anoniem beoordeel.

Benewens aantreklike geldpryse is daar ook vier wisseltrofeë vir skole op die spel. Boonop wen die skool wat die meeste inskrywings instuur, R1 000! Daar is vier afdelings: drie prosa-afdelings en een poësie-afdeling. Afdeling A is vir leerders (Juniors: graad 8 tot 9) en (Seniors: graad 10 tot 12), Afdeling B behels prosa vir volwasse skrywers wat nog nie voorheen gepubliseer het nie. Afdeling C is 'n ope afdeling vir skrywers wat wel al voorheen kortprosa teen vergoeding gepubliseer het. Afdeling D is 'n poësie-afdeling vir gepubliseerde en ongepubliseerde deelnemers.

Leerders wat aan Afdeling A deelneem, moet kortprosa van hoogstens 1 000 woorde voorlê; volwassenes wat aan die wedstryd deelneem se kortprosa mag hoogstens 2 500 woorde lank wees, en digters word beperk tot gedigte van hoogstens 40 versreëls lank.

Daar is aantreklike geldpryse in elke afdeling, asook 'n aanmoedigingsprys (ook n geldprys) in Afdeling A vir 'n deelnemer wie se moedertaal nie Afrikaans is nie.

Boonop kan wenners van alle pryse 'n slypskool vir ontluikende skrywers, wat die Bloemfonteinse Skrywersvereniging in Augustus 2010 aanbied, gratis bywoon. Vanjaar se slypskool word deur die gewilde dr. P.G. du Plessis aangebied - 'n geleentheid wat potensiële skrywers nie mag mis nie! Al die bekroonde inskrywings sal in Inkvars 2010, 'n huishoudelike publikasie van die Bloemfonteinse Skrywersvereniging, gepubliseer word.

Die wedstryd word met die steun van die Nasionale Afrikaanse Letterkundige Museum en Navorsingsentrum in Bloemfontein geadministreer. Die wedstryd word sedert 1989 landwyd aangebied en het sedertdien gegroei tot die grootste in sy soort in die land. Alle inskrywings moet van 'n voorgeskrewe inskrywingsvorm vergesel wees.

Die wedstryd word aangebied deur die BSV in samewerking met NALN en word vanjaar geborg deur die Fakulteit Geesteswetenskappe van die Universiteit van die Vrystaat.

Inskrywings:

Bel dadelik vir mev. Christa Jordaan by 051-5229155 in werksure, of mej. Lelani Fourie by 0733883377 om die vorm, wedstrydreëls en onderwerpe te bekom. Of vra dit elektronies aan by bloemsv@yahoo.com

Mediabekendmaking oor landwye skryfwedstryd van Bloemfonteinse Skrywersvereniging deur die voorsitter, me. Corlietha Swart, op 8 Maart 2010