Ou Langoor donkie is deurmekaar. Die afgelope paar maande het hy die eienaardigste stories gehoor by die ander diere op die plaas: die ou koeistalle word nou verander in 'n towerplek! As klein Giggel gansie nie uitasem kom vertel van potte verf wat afgelaai word nie, dan is dit Bertus bok wat moes koes voor 'n lorrie vol ligte! Die eienaardigste storie nog is Aristoteles aap wat vertel van 'n verhoog en kartondose vol… boeke!

Langoor is deurmekaar, want hy weet wat gras en voëls en damme is, want hy sien dit elke dag, maar wat op aarde is ligte en verf en 'n verhoog en boeke?
Hy besluit om bietjie van naderby te gaan ondersoek instel. Hy loop verby die plaasdammetjie, oor die sagte gras… en daar sien hy dit: die ou koeistalle, maar daar is iets vreemds in die lug. Hy snuif 'n paar diep snuiwe, dink 'n rukkie, en toe tref dit hom: dis die reuk van toweragtige stories! Hy loop tot by die venster en kyk in, en sowaar, daar in die goudgeel kamer wat eers Karel koei se stal was, staan pienk en groen en blou meubels vol boeke! En daar waar die koeie aandete geëet het staan 'n verhoog met die allermooiste pers gordyne, en dit alles word verlig deur die ongelooflikste geel, groen, rooi en blou ligte!

Net daar en dan draai Langoor om en laat spaander terug om die ander diere te vertel van sy toweragtige ontdekking!

Ons stel bekend Kinderteater en -boekwinkel

Van 18 Oktober tot 31 Oktober speel Johan Giliam (The Res), Lani van der Merwe (The Res), Marike Gersbach en Marhette van Schalkwyk (7e Laan, Song vir Katryn) in Die Maniese Pie-eet Kompetisie. Die drie Mokkefaanse helde Rex, Martie en Danie moet die nare Boosbalie uitoorlê sodat hulle betyds by die pie-eet kompetisie kan uitkom. Wo. -Vr. 15:00, Sa. 11:00 en 12:30. Kinders R30, volwassenes R40.

Hier is ook dramaklasse, aangebied deur Marhette van Schalkwyk, met die oog op deelname aan die produksies, eisteddfods of sommer net pret. Vir die kleingoed wat eerder met hulle hande werk, is daar kunsklasse by Henriëtte waar hulle kan leer hoe om doelgerig te knip, plak en eksperimenteer. En vir die outjies wat so 'n bietjie towerkrag wil saamneem huis toe, is daar kinderboeke om van te kies en keur.

Kom word deel van ons kinderkuns en -kultuur by Babbelbox, Kimiad-gronde, Wekkerstraat, Moreletapark.
Kontak Marhette 082 786 3966 of Henriëtte 083 626 8881