Harry Kalmer, bekroonde skrywer en dramaturg en skepper van die geliefde "Vlieger" stories in Rapport bring sy gewilde skryfkursus vir die eerste maal na Potchefstroom.

"Die kursus is daar om mense te help om hulle stories te vertel, maak nie saak of hulle nog nooit geskryf het of net inspirasie nodig het om weer te begin nie.
"Mense wil skryf, maar hulle nie weet nie waar om te begin nie. Ander is bang omdat hulle dink mense gaan lag. Dit is maar twee van die dinge wat die kursus aanspreek."

Die tweedagkursus is 'n praktiese slypskool wat gaan oor die basiese reëls, vaardighede en truuks wat enigiemand kan leer. Deelnemers stap weg met 'n nuwe stel "gereedskap" wat hul help om hulle storie beter te vertel.

Daar word gekyk waar stories vandaan kom en hoe om hulle te gaan haal. Daar word gepraat oor die vrees vir skryf, publikasie en selfs sukses.
Beginne, eindes en die rol van verbeelding en persoonlike ervaring word bespreek.

Jy gaan leer hoe minder woorde jou meer laat sê en oor die belang van ritme, titels, "understatement" en gesigspunt.

Dinge wat jou sal help om stories te vertel wat mense graag wil hoor.
Daar word ook gekyk na die struikelblokke wat tussen jou en jou skryfwerk staan; maak nie saak of dit jou werk, jou familie of vrees vir kritiek is nie.

Die werkswinkel strek oor twee Saterdae 11 Junie & 18 Junie van 9.30 - 16.00 en is tot 12 deelnemers beperk. Dit vind plaas by Huys ten Bosch in Potchefstroom en kos R1750 (R1250 vir studente en pensionarisse) en sluit twee middagetes in.

Navrae kan gerig word aan Harry by kalmer@netactive.co.za