Via Afrika Uitgewers, 'n opvoedkundige uitgewery wat deel is van Media24/Naspers, is besig met 'n opwindende projek: die publikasie van 'n splinternuwe handboekreeks vir alle vakke - ook vir die vak Afrikaans Eerste Addisionele Taal. Die reeks oorspan alle fases in grade (dus Graad 1-12) en is gerig op die voorskryfmark vir skole landswyd. Ons nooi alle skrywers, voorheen gepubliseer of ongepubliseer, om tekste voor te lê vir oorweging.

As agtergrond: die Nasionale Departement van Onderwys is tans besig om 'n nuwe kurrikulum (die Nasionale Assessering Beleidsverklaring, NKABV of CAPS) oor 'n periode van drie jaar in te faseer. Grade 1-3 en Graad 10 is in 2011 geproduseer en voorgelê en boeke wat op die nasionale katalogus verskyn, word vanaf Januarie in 2012 in skole gebruik. Volgende aan die beurt, is die publikasie van taalhandboeke en leesboeke vir Grade 4-6, gereed vir voorlegging teen vroeg Februarie 2012.

Via Afrika is baie trots op ons 100% suksessyfer tydens die vorige rondtes waar al die boeke wat voorgelê is vir die vak Afrikaans goedgekeur is. Omdat die proses genasionaliseer word (voorheen was daar verskillende geleenthede om op provinsiale vlak voor te lê, nou is dit slegs een geleentheid op nasionale vlak) is die kompetisie strawwer, maar die geleenthede en beloning groter - des te meer ons opgewondenheid oor die sukses wat behaal is en ons strewe om voort te bou op hierdie prestasie.

Die reeks Via Afrika Afrikaans Eerste Addisionele Taal bestaan uit Leerderboeke (handboeke vir leerders), Onderwysersgidse (vir die onderwyser, met opwindende hulpbronne ingesluit) en Leesboeke waarin leerders alle soorte tekste vir genot kan lees. Anders as die reeks vir Huistaal, word hierdie reeks gerig op leerders wie se moedertaal nie Afrikaans is nie, maar die vak neem as hul tweede taal en dus besig is om 'n nuwe taal aan te leer. Dit is 'n heterogene en baie wye groep leerders: Engelstaliges, leerders met verskeie Afrikatale as moedertaal (byvoorbeeld Sothosprekers in die Vrystaat) en selfs immigrante (byvoorbeeld Chinese wat aan privaatskole leer).

Tekste vir die leesboek moet dus "maklik" wees: goeie en interessante stories waarmee leerder in Grade 4-6 (hulle ouderdom is 10-14 jaar) kan identifiseer, vol kleurryke karakters, met sterk spanningslyne en vol verrassings - maar "maklik" in die sin dat dit nie onnodig moeilike taal gebruik nie. Alhoewel ons ook leerders se woordeskat wil verbeter, moet die taal nie so 'n groot uitdaging wees dat dit die lekkerte van die leeservaring oorskadu nie.

Die leesboeke sal bestaan uit verskillende soorte tekste - hoofsaaklik fiksie, maar ook 'n klein deel nie-fiksie:

• kort kortverhale (ongeveer 800 woorde, tot maksimum 1000 woorde / vier A5-bladsye) in verskeie genres (spanningsverhale, speurverhale, rillers en grillers, avontuurverhale, liefdesverhale, sprokies, fabels, volksverhale, wetenskapsfiksie, grafiese verhale soos strokies en spotprente, ens.) en oor enige onderwerp: enigiets wat sal inpas in die leefwêreld van hierdie jong lesers;
• gedigte: kort tot langer gedigte (maksimum lengte is een A5-bladsy) wat veral vol pret is (dus eerder ligte as swaar temas); en gedigte wat steeds "goeie" gedigte is (byvoorbeeld vol gevoelstaal en wat verskeie stylfigure gebruik), maar wat maklik en toeganklik ervaar sal word deur hierdie leerders wat Afrikaans aanleer;
• kort dramatekste / dialoog: kort tekste wat as goeie voorbeelde kan dien van die genre drama, met dialoog en ander teksaspekte van drama;
• nie-fiksie: tekste oor feite en geite en vreemde en nuwe goeters wat binne die leefwêreld van 10-14 jariges sal inpas en vir hul interessant sal wees. Dit kan interessant aangebied word as raaisels, vrae en antwoorde, ontdekkingsreise, ens.

Kobus Geldenhuys tree op as samesteller van die leesboeke. Daar word drie leesboeke gemaak, een vir elke graad: Leesboek Graad 4, Leesboek Graad 5 en Leesboek Graad 6. Die aantal bladsye per boek is ongeveer 80 bladsye. Die moeilikheidsgraad van die tekste sal effens (maar subtiel) toeneem tussen Graad 4 en Graad 6.

Ons nooi alle skrywers, voorheen gepubliseer of ongepubliseer, om tekste voor te lê vir oorweging. Skrywers wie se materiaal gekies word, sal vergoed word by wyse van proporsionele tantieme tot die geheel van die bundel. Hierdie metode is die beste wyse van finansiële vergoeding op die langtermyn. As leesboek wat die potensiaal het om nasionaal voorgeskryf te word (wat landswyd deur skole aangekoop en gebruik kan word), hou dit die belofte van goeie inkomste vir bydraende skrywers in.

Die leesboek sal in volkleur gepubliseer word en tekste sal geïllustreer word deur verskeie talentvolle kunstenaars / illustreerders. Die formaat is A5.

Aangesien die datum vir voorlegging vinnig nader, en die hele produksieproses (redigering, illustrasies, uitleg en druk) nog voorlê, is die sperdatum vir bydraes belangrik en vinnig.

Sperdatums:

• Die eerste sperdatum is Maandag 14 November 2011 - hierdie datum is gerig op bydraes vir die Graad 4 Leesboek.
• Die tweede en finale sperdatum, gerig op bydraes vir die Graad 5 en Graad 6 Leesboeke, is Maandag 28 November 2011.

Bydraes sal onmiddellik gekeur en geplaas word waar dit die beste inpas (tussen Grade 4 tot 6).

Merk asseblief die bydraes deur aan te dui op watter vlak (Graad 4 / 5 / 6) dit gerig is.

Bydraes kan gestuur word aan:

Kobus Geldenhuys by gelden@iafrica.com.

Die verantwoordelike uitgewer is Dr Rudi MR Venter.
Vir navrae kan hy gekontak word by rudi.venter@viaafrika.com.

Ons sien uit om jou bydrae te ontvang.

Kobus Geldenhuys
(Samesteller: Via Afrika EAT Leesboeke Grade 4 / 5 / 6)

2011-11-07