Werfjoernaal
 
2017-04

werfjoernaal
argief



Kortlys vir die 2017 Sanlam-prys vir Jeuglektuur

Tafelberg en Sanlam kondig met opgewondenheid die finaliste vir vanjaar se Sanlam-prys vir Jeuglektuur aan. Ses finaliste is in elk van die drie afdelings - Afrikaans, Engels en Afrikatale - aangewys. Altesaam R54 000 is op die spel: R12000 vir die wenner (goud) en R6 000 vir die naaswenner (silwer) in elke kategorie.

Die finaliste in die kategorie vir Afrikaans is:

  • Jelleke Wierenga van Napier;
  • Riana Scheepers van Wildernis;
  • Jan Vermeulen van Despatch;
  • Annerle Barnard van Bloemfontein;
  • Nellie Alberts van Calvinia; en
  • Carin Krahtz van Centurion.

Die finaliste in die kategorie vir Engels is:

  • Nick Wood van Londen;
  • Nerine Dorman van Welcome Glen, Kaapstad;
  • Lesley Beake van Stanford;
  • Joanne Hichens van Muizenberg;
  • Erna Müller van Windhoek; en
  • Jayne Bauling van Witrivier.

In die kategorie vir Afrikatale ding die volgende finaliste mee:

Nguni-tale

  • Dumisani Hlatswayo van Cosmo City, Johannesburg;
  • Siphatheleni Kula van Butterworth (Oos-Kaap); en
  • Thabi Nancy Mahamba van KwaNdebele (Mpumalanga).

Sotho-tale

  • Mathete Molope Piet van The Tramshed, Pretoria;
  • Thabo Kheswa, van Bophelong, Vanderbijlpark; en
  • Lebohang Jeanet Pheko van Meloding, Virginia.

Tshivenda

  • Lazarus Mamafha van Kutama, Zimbabwe;
  • Thilivhali Thomas Mudau van Rosslyn, Pretoria.

Xitsonga

  • Musa Given Sithole van Kempton Park.

Die wenners word in Oktober 2017 aangekondig en die wenboeke sal kort daarna op boekwinkelrakke en in e-boekformaat beskikbaar wees.

Die Sanlam-prys vir Jeuglektuur word elke twee jaar toegeken. Hierdie jaar het Sanlam die "250 woorde per dag"-veldtog begin om die kompetisie meer toeganklik vir jong en nuwe skrywers te maak. Deur by die "250 Words a Day"-groep op Facebook aan te sluit het deelnemers toegang tot 'n span ervare en gepubliseerde skrywers gehad wat as mentors optree. Skrywers is aangemoedig om elke dag 250 woorde te skryf en so ’n voltooide manuskrip teen 7 Oktober 2016 gereed te hê. Skrywer Fanie Viljoen was een van die mentors en sê hy is bly dat sosiale media ingespan is om nuwe skrywers te ontdek. Ten spyte van die uitdagings, was dit die ideale manier om skrywers aan te moedig om elke dag net 'n klein gedeelte te skryf sodat dit uiteindelik kan groei tot ’n volwaardige manuskrip. Ek kon sien hoe ywerige skrywers se werk van dag tot dag verbeter. Alle pogings gaan dalk nie nou al publiseerbaar wees nie, want soos mense in die bedryf weet; ’n boek vra vir baie sweet en bloed. Vir sommiges is daar nou egter 'n stewige fondament gelê, en ander besef watter dissipline nodig is om jou boek op 'n winkelrak te kry.

Buiten dat dit die kompetisie meer interaktief gemaak het en 'n wyer gehoor bereik het, is 60 meer inskrywings as tydens die vorige kompetisie ontvang.

Aantal inskrywings per taal:
Engels: 55
Afrikaans: 33
Zulu: 14
Venda: 7
Xhosa: 7
Xitsonga: 5
Ndebele: 4
Sesotho: 4
Setswana: 3
Sepedi: 2

"As Welvaartmeesters verstaan en respekteer ons wat dit verg om die ses-en-twintig letters van die alfabet te omskep in iets van groter waarde. Die Sanlam-prys vir Jeuglektuur vier skrywers se vermoë om die meeste te maak van wat hulle het. Hulle boeke skep verrykende ervarings vir ons jeug en het die vermoë om lesers op 'n reis te neem wat hulle laat lag, hulle bang maak en hulle na plekke neem wat vir ewig by hulle sal bly, sê Elena Meyer (senior borgskapsbestuurder by Sanlam).

Media-inligting:
Hevette le Grange
Reklame-koördineerder: Woordeboeke, en kinder- en jeugboeke
021 406 3414 / 083 234 5774
hevette.legrange@nb.co.za

 

 

 

 

 


Voordeur en inhoud | Jong woordvrate | Ouer woordvrate | e-pos

STORIEWERF word aangebied saam met woordvrate en storiemakers
van alle soorte en groottes.

Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2016