Die sewende Klein Karoo Nasionale Kunstefees is vanjaar bevoorreg om Piet Grobler, een van die land se veelsydigte en gewildste kunstenaars, as amptelike feeskunstenaar te hê.

Sedert 1996 vereer die KKNK jaarliks 'n kunstenaar op hierdie wyse. Die eer het al kunstenaars soos Jan Vermeieren, Hardy Botha, Eric Laubscher, Willie Bester en Wendy Malan te beurt geval.

Piet Grobler het sedert hy in 1996 voltyds 'n kunstenaar geword het, diep in die harte bekruip van mense wat sy illustrasies geniet en bewonder in tydskrifte soos Insig, De Kat, Sarie en Sunday Times. Hy het ook al vele jong lesers met sy kinderboekillustrasies betower.

Grobler se bydrae tot die KKNK-fees is 'n voortsetting van 'n idee waarmee hy in Augustus 2000 met groot sukses gewerk het tydens 'n uitstalling in die kunsgalery van die Universiteit van Stellenbosh.

Hy wil 'n week voor die fees saam met kinders van die Oudtshoorn-omgewing aan 'n installasie van 'n "driedimensionele illustrasie" begin werk. Die meelewing van die plaaslike gemeenskap kom ooreen met die KKNK-feesdireksie se missie van gemeenskapsbetrokkeneheid en -ontwikkeling.

Die inspirasie vir Grobler se projek is erg kosmopolisites: 'n Kinderboek deur 'n Italiaanse skrywer van 'n Chinese sprokie wat Grobler onlangs vir 'n Nederlandse uitgewer geïllustreer het.

"Die doel is om boeke lewendig te maak vir kinders," sê Grobler. "'n Bonus is dat kinders wat nie gewoonlik aan die fees deelneem nie, aan 'n kreatiewe proses meedoen."

Die kleinspan sal in 'n slypskoolopset Grobler help om reusefantasieplante en -diere te skep en te versier. Wanneer die fees op 7 April begin, sal 'n installasie in verskillende mediums besokers begroet - 'n ruimte vol kleurryke driedimensionele plante wat oud en jonk op 'n verbeeldingsvlug soos min sal neem.

Grobler voel sterk daaroor dat kinders van jongs af aan kuns blootgestel moet word. "Mense kla oor die skrale belangstelling in die kunste, maar daar word bitter min gedoen om die gehoor van môre voor te berei.

"'n Goeie prenteboek is die eerste kunsgalery waardeur 'n kind stap," beskryf Grobler die belang van sy werk as kinderboekillustreerder.

Besoekers sal ook van Grobler se jongste kunswerke kan besigtig.

Grobler het al reg oor die land uitstallings gehou en ook verskeie pryse vir sy illustrasies by internasionale uitstallings gewen.

Ter plaatse het hy die Akademie vir Wetenskap en Kuns se Tienie Holloway-prys in 1997 ontvang vir sy bydrae tot kinderboeke sowel as 'n Mondi Paper-prys vir die gewilde strokiesprent wat hy saam met Philip de Vos doen.

Grobler is vaardig in verskeie mediums - van water-, akriel- en olieverf tot rekenaargrafika, syskerm- en etswerk.

(Berig het oorspronklik verskyn in die KKNK se bylae tot Nasionale Koerante Februarie 2001)

Piet Grobler is die skepper van Storiewerf se woordvrate.