Moet nooit weer sê boeke maak tog nie nie 'n verskil nie. Ek het so pas 'n wonderlike brief ontvang van Kabelo Duncan Kgatea, wat in November die Sanlam-prys vir Jeuglektuur: Afdeling Sotho-tale ontvang het vir sy Tswana-jeugverhaal Njeng manong, fa ke sule!
Kabelo is 'n mynwerker by Amplats (Anglo Platinum) op Rusterburg. Toe Corna van der Spoel hoor dat 'n mynwerker by Amplats 'n Sanlam-prys gewen het, sê sy vir my ek moet vir haar 'n perslegger stuur - sy het 'n vriend wat by Amplats se personeelblad werk, en sy is seker hy sal graag iets oor Kabelo wil doen. Natuurlik stuur ek toe die perslegger.
Later, in 'n telefoongesprek met Kabelo, hoor ek hierdie persoon gaan nie alleen 'n foto-artikel oor Kabelo in die blad doen nie, hy het ook 'n ontmoeting tussen Kabelo en die MD van Amplats georganiseer.
Nou kry ek 'n pakkie van Kabelo met 'n eksemplaar van die tydskrif en 'n briefie waarin hy sê: "I have been promoted. I am now working as a communication officer. I am not going underground any more."
Is dit nie wonderlik nie? A latter-day fairy tale if ever there was one!

Louise Steyn
Uitgewer: Kinder- en Jeugboeke Tafelberg-Uitgewers