Die tyd het weer aangebreek vir Skrywers 2002, die opwindende skryfwedstryd wat aangebied word deur die Bloemfonteinse Skrywersvereniging. Die wedstryd word geborg deur Volksblad en met die steun van die Nasionale Letterkundige Museum (Naln) geadministreer.

Dit is nou die tyd vir ongepubliseerde skrywers om te gryp na die lei en griffel (of verkieslik die tikmasjien of rekenaar) en te begin skryf!

John Steinbeck het gesê: "I have written a great many stories and I still don't know how to go about it except to write it and take my chances." Gaan jy die kans vat? Jou skryftalent kan jou 'n hele paar Rand in die sak bring. Die totale prysgeld vir hierdie jaar is R5 000. Dit sal verdeel word tussen die wenners van die onderskeie afdelings. Buiten die geldpryse is daar ook vier wisseltrofeë vir skole was op die spel.

Skrywers 2002 is 'n kompetisie wat poog om sluimerende skryftalent te ontwikkel en Afrikaans te bevorder. Die wenverhale, opstelle en sketse sal gebundel word in die publikasie Inkvars 2002.

Wie mag deelneem?
Enige persoon wat nog nie teen vergoeding skeppende kortprosa gepubliseer het nie - in die sin dat dit in boekvorm of in tydskrifte verskyn het of deur radio of televisie gebruik is en die outeur daarvoor betaal is - mag in die toepaslike afdeling(s) deelneem.

Afdelings
Daar is drie afdelings:
· Die Junior Afdeling vir leerders in grade 8 en 9;
· Die Senior Afdeling vir leerders in grade 10 - 12; en
· Die Ope Afdeling vir volwassenes (of leerders)

Slypskool
Pryswenners woon ook die Bloemfonteinse Skrywersvereniging se jaarlikse Slypskool vir Ontluikende Skrywers in Bloemfontein gratis by. Hierdie slypskool sal op Saterdag 17 Augustus gehou word.

Sluitingsdatum
Die sluitingsdatum is Vrydag 10 Mei 2002.

Navrae
Telefoniese navrae kan gerig word aan die volgende bestuurslede van die Bloemfonteinse Skrywersvereniging:

• Mev. Cecilia van der Linde (051) 444 0155 a.u.
• Mnr. Stoffel Cilliers (051) 436 8089 n.u.

Inkvars 2001
Die publikasie Inkvars 2001, wat verlede jaar se wenverhale bevat kan ook by Cecilia of Stoffel bestel word. Inkvars 2001 is 'n onontbeerlike publikasie vir elke onderwyser en kan gebruik word as maatstaf om leerders se skryfvermoëns te beoordeel. Die beoordeelaarsverslag wat in die bundel vervat is, gee 'n aanduiding van die standaard van die inskrywings.
Inkvars 2001 is ook gemik op diegene wat bloot belangstel in lees en veral die lees van opkomende skrywers se werk. Dit maak verder 'n ideale geskenk.