Waar jy woon?

Ek het op Carnarvon, 'n klein Karoodorpie, grootgeword, maar deesdae bly ek in Bloemfontein.

Watter soort werk doen jy?

Ek is uitgewer van kinder- en jeugboeke by LAPA Uitgewers. Vroeër was ek die redakteur van Volksblad se JIP-bylae.

Wat is jou gunsteling boek?

Dis 'n baie moeilike vraag! As ek net een boek mag kies, is dit Disgrace van J.M. Coetzee. Maar ek's ook mal oor Stephen King, Roald Dahl, Stephenie Meyer en J.K. Rowling se boeke.

Het jy as kind geweet dat jy eendag 'n skrywer wil word?

Ek was van kleins af versot op boeke, maar ek het eers vroeg in my hoërskooljare regtig begin dink dit sal wonderlik wees om eendag 'n skrywer te word.

Hoe het jy begin skryf?

Ek het aanvanklik vir skryfkompetisies ingeskryf. Aan die begin het ek nie gewen nie, maar ek het al hoe beter gevaar, en dit het my aangespoor om meer en meer te skryf. In matriek is my eerste stories in tydskrifte gepubliseer, en aan die einde van matriek het ek my eerste kinderboek geskryf. (Dit is later deur Human & Rousseau uitgegee as Pretpark.)

Ek het een pouse op die skoolterrein opgemerk dat daar verskeie kinders is wat met jou boeke rondloop of besig is om dit te lees! Ek is doodseker dat hulle dit nie kan neersit nie en ook in klastyd onder die banke sit en lees! Hoe laat dit jou voel?

Dit is natuurlik fantasties! Uiteindelik is dit die mooiste kompliment wat enige skrywer kan kry - dat mense jou boeke geniet. Partykeer voel dit nogal vreemd om te dink iemand lees die stories wat ek hier alleen agter my rekenaar sit en uitdink!

Christiaan Watney en Rudy Nortjé (beide graad 5) was mal oor Rugbypret en Duskant die doodlyn. Uiteindelik is daar iemand wat hulle taal praat! Die boeke was veral lekker om te lees omdat hulle beide sportsoorte beoefen. Hulle wil weet of jy nie 'n boek wil skryf wat oor tennis handel nie? Hulle speel graag tennis en daar is nie juis boeke beskikbaar wat tennis as 'n tema het nie.

Hmmm, ek sal Christiaan en Rudy se idee met my uitgewer bespreek - dalk hou sy daarvan en pak ek iewers in die toekoms so iets aan!

Wie is die eerste persoon vir wie jy 'n manuskrip gee wanneer jy dit voltooi het, om dit te lees?

Gewoonlik is my uitgewer, Miemie du Plessis, die heel eerste mens wat my stories lees. Sy gee al jare lank my boeke uit en ek weet sy gee altyd die regte raad oor 'n storie. Sy is die een wat moet besluit of my stories goed genoeg is om as boeke uitgegee te word, en sy gee baie keer ook wenke oor hoe ek 'n storie snaakser of opwindender of beter kan maak.

Ná jou besoek aan Mikro was baie kinders se neuse aan Suurlemoen! vasgeplak. Wat dink dit jy maak dit 'n lekkerleesboek?

Ek hou van boeke wat 'n mens laat lag, en Tiaan, die hoofkarakter en verteller in Suurlemoen!, is vir my baie snaaks, al moet ek dit self sê. Terwyl ek die storie geskryf het, het ek soms kliphard gelag vir sy sêgoed of die weird goed wat hy aanvang - dis vreemd, maar soms het dit regtig gevoel of dit nie ek is wat dit uitdink nie! Die ander karakters, Zane en Bongi en Liezl, is almal op hul eie manier ook snaaks. Ek dink ook die boek is gewild omdat dit oor liefde en musiek gaan - gewilde temas in die meeste jongmense se lewe.

Die uitleg van Suurlemoen! is nogal uniek. Het jy enige insae daarin gehad?

Ja, terwyl ek die storie geskryf het, het ek presies aangedui waar elke nota en foto moet wees. Daarna het die uitlegkunstenaar Elsabé Milandri die teks gekry. Sy het al die notas met die hand oorgeskryf, die illustrasies gemaak, en modelle gaan soek en afgeneem om in die boek te gebruik. Ek dink sy het fantastiese werk gedoen - al die karakters lyk nes ek gedink het hulle behoort te lyk, en sonder Elsabé sou die boek beslis nie so mooi gelyk het nie. O, en sy het ook 'n hele paar visuele grappies van haar eie in die teks gesit!

Is Suurlemoen! gebaseer op enige kinders wat saam met jou op skool was?

Uhm ... sjoe, ja, ek dink nogal so. Een van my beste vriende op hoërskool was nogal baie soos Zane - hy't gedurig al die meisies gekry, ook dié waarvan ék gehou het! Ons het natuurlik baie daaroor baklei, maar ek het hom maar altyd weer vergewe. Twee mense het al vir my gesê Tiaan laat hulle baie dink aan hoe ekself op skool was - 'n bietjie van 'n nerd, met 'n effe vreemde humorsin. Ek weet nie of dit waar is nie!

Speel jy 'n musiekinstrument?

Nee, glad nie. Ek het 'n jaar of twee klavierlesse geneem op laerskool, maar ek het dit geháát! Ek kry nou nog koue rillings as ek dink aan daai toonlere wat ek saans moes oefen voor 'n musiekles. Deesdae is ek spyt dat ek nie maar aangehou het daarmee nie, want ek sou baie graag 'n musiekinstrument wou speel. Maar ek dink nie ek het die geduld om dit te leer nie.

Was jy al ooit in 'n band? Indien wel, wat was die naam?

Nee, glad nie. Maar ek sou baie graag in 'n heavy metal band wou wees!

Ek het in Rapport gelees van die "biblioteektannie" en die "wonderlike biblioteek op Carnarvon". Hoe dink jy moet die ideale biblioteek lyk?

Ek dink die ideale biblioteek is nie 'n stil, vaal, vervelige plek nie. Dit moet 'n plek wees waar boeke so opwindend en kleurvol moontlik aangebied word, sodat soveel moontlik mense kan ontdek hoe great dit is om 'n lekker boek te lees. Ek het onlangs 'n kleuterboek getiteld Bertus soek 'n boek gepubliseer - daarin is 'n lawwe, eksentrieke biblioteektannie met die naam mevrou Haasbroek. Ek dink sy is die perfekte biblioteektannie!

Wat kan ons in 2009 op die rakke verwag?

Ek het pas 'n nuwe tienerboek, Perfek, gepubliseer, asook twee nuwe Stalmaats-boeke, Seeponies en Roset. Later vanjaar verskyn Middernagfees, 'n bundel propvol grilstories. 'n Boek waaroor ek veral opgewonde is, is Virus, wat binnekort op die rakke sal wees. Dit is 'n grillerige wetenskapfiksieverhaal vir tieners, oor 'n zombievirus wat die aarde tref. Die boek het nie net teks nie - dit bevat ook fantastiese strokiesprentillustrasies deur die kunstenaar Daniël du Plessis. Sy zombies lyk regtig scary!

Wat was jou bynaam op skool?

O nee, ek weier om te sê! Jy sal my moet vasbind en kielie voor jy dit uit my kry, want ek het my bynaam geháát!

Hoe het jy op die skuilname Tania Brink en Lize Roux gekom?

Tania Brink is sommer net 'n naam wat ek uitgedink het, ek kan glad nie meer onthou hoe ek daarmee vorendag gekom het nie. Lize Roux het my uitgewer uitgedink - ek het vir haar gesê ek sal die Stalmaats-boeke onder 'n skuilnaam uitgee soos sy gevra het, mits sy 'n naam en van kan uitdink met die letters "x" en "z" daarin. Ek wou haar sommer net 'n bietjie laat kopkrap, maar sy het onmiddellik die naam "Lize Roux" uitgedink!

Skryf jy party van jou boeke oor jou kinderdae?

Sjoe, dis 'n lekker vraag! Ja, ek dink daar is iets van my eie kinderdae in elke boek wat ek skryf. Ek onthou byvoorbeeld nog hoe magteloos 'n mens kleintyd kon voel as 'n onderwyser of 'n ander grootmens jou onregverdig behandel, en daarom het ek boeke geskryf soos Wiskunde gee my maagpyn en Superheroes vlieg net saans. My uitgewer sê ek het nooit regtig grootgeword nie!