Hoe cool goed werk is na my mening die coolste boek wat nog hierdie jaar verskyn het.

Die boek verduidelik in verstaanbare beskrywings hoe die nuutste tegnologiese patente werk, en daar is ook heelwat interessante inligting oor die werking van die menslike liggaam.

Na jy hierdie boek gelees het, weet jy hoe werk goed wat jy nog altyd oor gewonder het, én goed wat jy nog nooit eers van gehoor het nie.

Kleurvolle foto's en sketse lig die feite, inligting en beskrywings van die boek toe. Hierdie boek is egter meer as net 'n prenteboek. Dit is nie 'n boek wat jy op een slag kan deurlees en alles onthou nie. Hierdie boek moet eerder gesien word as 'n "ensipklopedie van cool goed". Elke keer as mens die boek optel, sien jy iets anders raak of verstaan jy iets beter as die vorige keer.

Die boek bied inligting oor 'n groot verskeidenheid onderwerpe. Hoe dinge soos die internet, kameras, kitare, DJ-toerusting, hitte, stofsuiers, windtonnels, Radio-ID-skyfies, antibiotika, kunsmatige bevrugting, wonings, en selfs sokkerballe werk, word in die boek verduidelik. Boonop bied die boek telkens 'n vooruitskouïng van patente wat ons in die toekoms kan verwag.

Hoe cool goed werk is 'n lywige hardebandboek met 256 bladsye. Die boek het 'n besondere interessante voorblad, en is mooi genoeg om op enige koffietafel te staan. Dit is natuurlik 'n móét vir alle skoolbiblioteke.

Hierdie boek is spesiaal geskryf vir innoverende jongmense, maar enige persoon wat graag op hoogte bly van die tegnologiese ontwikkeling, sal ook die boek terdeë geniet.

LAPA-Uitgewers
ISBN: 0 7993 3624 6