Nou word Liewe Heksie "hi-tech" in ses nuwe stories deur die veteraan-skrywer, Verna Vels. In "Liewe Heksie en die rekenaar"" maak Heksie kennis met 'n rekenaar en dié se muis ("Dis 'n snaakse muis," lag Heksie. "Waar is sy ogies en snorre?") Soos gewoonlik kom die moeilikheid na Heksie toe en nie andersom nie, maar sy is en bly ons heldin der heldinne wat net so 'n bietjie vergeet van kleure en nie eintlik weet van groot woorde nie.

Die bekende aartsvyande, die Gifappeltjies en die Geelheks, wend soos gewoonlik pogings aan om die Silwerroos te steel, maar in Liewe Heksie en die rekenaar raak sy ook slaags met Vickus Virus, die rotbende en trolle. Al die ou bekendes is daar: Karel "Rondebolkeil" Kat van die stad, Matewis en Blommie en natuurlik Koning Rosekrans, wie se naam 'n aantal interessante variante bygekry het ("Rosevirus, Rosedoedel"), en die "Koningin-By". Ons maak ook kennis met die donkie (Doedel) wat Heksie oortuig is dat sy getoor het.

Na vele boeke, televisiereekse, kassette en ook CDs bly Liewe Heksie nog net dieselle - 'n groot bron van vreugde. En wat 'n ervaring was dit nie om op Aardklop vir Verna Vels te hoor voorlees uit haar werk nie, die oënskynlik moeitelose oorgang van die bekende nasale "Haai, oe, Blommie" tot die verontwaardigde stem van "koning Rosevirus" is 'n kragtoer in enige taal.

Die bekende kunstenaar Piet Grobler se tekeninge is soos 'n vars briesie, of dan besem, vir Liewe Heksie. En al is die teikenlesers eintlik dié vanaf vier tot sewe jaar, is dié leser van nuuts af bekoor, soek ek haar naam onder die Baie Belangrike Name van die vorige eeu. Het sy dan nie by uitstek ook my eeu gevorm nie? Wat kan mens seg: die towerwoord is `Eeu daba dottie!'

Jomarié Dick is redaksionele assistent by "Insig"