J. Moestafa Tau, die "koelkop-katteheld" van Gaberone, is die hoofkarakter van hierdie vermaaklike kattestorie.

Die sterkte van dié kinderverhaal lê nie in 'n asembenewende spanningslyn nie. Die hele boek wentel om die karakter van J. Moestafa Tau. Reeds is die eerste paragraaf lees ons: "Besoekers verwonder hulle aan Gaberone. Maar J. Moestafa Tau is onbeïndruk. Hy woon sy lewe lank in Gaberone...Die stad ken hy soos die agterkant van sy poot."(p1)

In Gaberone is J. Moestafa Tau, die huiskat van die Moroka's, 'n gerekende en gerespekteerde kat. Wanneer die Moroka's na Molepole ,'n klein dorpie in die platteland moet trek, druip J. Moestafa Tau se ore mismoedig. "'Die hele sosiale toneel sal tot stilstand kom as ek nie hier is nie,'" dink hy beangs".(p9)

Dis as gevolg van die trekkery dat J. Moestafa Tau verdwaal en 'n groot avontuur beleef. Mettertyd word die "vetgevoerde laventelkat" van die stad "'n vreeslose jagter." Hierdie verandering manifesteer in sy naam. Hy besluit om homself voortaan slegs "Tau" (twsana vir "leeu") te noem. Daarmee skaar J. Moestafa Tau hom by die groot gevreesde katte van die veld.

J. Moestafa Tau is 'n uiters geloofwaardige karakter. Konsekwent beleef die leser die gebeure deur sy intelligente kat-oë. Van sosiale vlinder in Gaberone tot verskrikte en soms papnat kat in vreemde gebied loop nie net sy simpatieke menslikheid nie, maar ook sy manhaftige aanvaarding van sy lot soos 'n goue draad deur die hele storie. Dié kat bly by jou spin lank nadat jy die boek neergesit het.

Die res van die dierekarakters in die boek stry ook om die leser se guns. Met enkele goedgekose woorde en frases word selfs die minder belangrike karakters fyn geteken. Die breëkoparend het byvoorbeeldd "'n baie verfynde stem - wat Tau herinner aan dié van die Britse ambassadeur in Gaborone wat hy eenkeer by 'n skemerpartytjie ontmoet het."

Ruimteskildering is prentjiehelder en herskep die landskap van Botswana vir die leser in keurige, oorspronklike beskrywings: "'n Blink swart teerpad loop soos 'n afgerolde lint deur die dorp met sanderige paadjies wat na links en regs tussen die netjiese kampongs deurkronkel".(p.10)

Die wyse meneer Moroka en sy liefdevolle vrou is saam met hulle twee kinders 'n welkome toevoeging tot die uitbouing van 'n wyer, veelrassige Afrikaanse jeugliteratuur.

J. Moestafa Tau is oorspronklik in Engels geskryf. Die Engelse uitgawe is in dieselfde formaat ook by Tafelberg beskikbaar. Dis in Afrikaans vertaal deur Linda Rode.

Cora Coetzee (s)kattige katprentjies sal enige katliefhebber se hart laat bokspring.

Keurig uitgegee, is hierdie boek 'n moet vir katteliefhebbers van alle ouerdomme en kan dit selfs 'n kattehater of twee se hart versag.