Die reeks van drie boeke vertel van die avonture van Len, 'n menslike ruimtevaarder, en 'n groepie Aardlinge in hulle soeke na nuwe, bewoonbare planeet.

In die eerste aflewering, Monsterduiwe, maak ons kennis met Len en die oorlewendes van 'n wêreldwye ramp. Die oorlewendes is in drie groepe opgedeel - die eenvoudige grotbewoners, 'n skelm, gemene motorfietsbende en swerms reuse duiwe. Len bevind homself in die middel van 'n permanente skermutseling tussen die twee mense-faksies terwyl hy probeer uitpluis wat met die wêreld gebeur het, maar niemand wil rêrig daaroor praat nie.

Intussen val die vleis-etende duiwe die mense heeltyd aan, en dis duidelik vir almal dat hulle sal moet wegkom voordat die mensdom heeltemal uitsterf.

In Die Doemprofeet beland Len en sy nuwe Aardsvriende op 'n vreemde, ysige planeet, KL2, nadat hulle die Aarde noodgedwonge moes verlaat het. Daar moet hulle die elemente van die natuur en 'n waansinnige diktator trotseer. Hulle ontmoet 'n interessante karakter, Brork, wat nes 'n reuse verkleurmannetjie sy kleur kan laat verander.

Die laaste boek in die reeks is Woestynvuur, wat op sy eie die lees werd is. Len en 'n klein groepie vriende verken 'n woestynagtige planeet wat geen tekens van lewe toon nie, maar daar is wel water en 'n bewoonbare oppervlak…. Het hulle uiteindelik 'n geskikte planeet gevind? Sal A2 (Aarde 2) hulle nuwe tuiste wees?

Roux-de Jager het die verskillende wêrelde meesterlik uitgebeeld en met net 'n halwe verbeelding sal jy jou kan inleef in die lewensgevaarlike situasies waarin Len kort-kort beland.

Die verhale bevat die regte hoeveelheid spanning en angs om jou van begin tot einde te boei en die karakters se kommentaar is skerp en sorg vir genoeg snaakse oomblikke.

Of jy nou glo in ruimtemannetjies of nie, hierdie reeks is lekker-lees en ontspannend. Moet net nie begin lees voor jy gaan slaap nie, want jy sal nie kan ophou nie.

Maryke Willemse