Zita moet haarself balanseer op die dun lyn tussen twee wêrelde. Sy loop met haar een voet in die nuwe, onbekende wêreld van 'n vreemde skool, waar alles anders is as dit waaraan sy gewoond is. Die kinders praat anders, lyk anders, dit ruik selfs anders in die koshuis. Die koshuiskos laat haar verlang na die ánder wêreld, waar Antie Rina roosterkoek oor die vuur braai en daar altyd mense in die strate is. Daar waar 'n helder geverfde blikvoordeur 'n teken van welvaart is. Die wêreld van Kieriekroek, waar sy grootgeword het. Maar ook hier voel Zita nie meer tuis nie. Want sy het nog nooit regtig ingepas nie. Tog is daar in hierdie deurmekaartyd ook Waldo by die nuwe skool, Waldo by wie sy, ten spyte van hulle verskillende wêrelde, soms tuis voel. En Zita weet: Dis nie regtig oor wie sy is dat sy uitgestoot voel nie - dis oor die ding met haar pa . . .

In hierdie debuutroman raak Anzil Kulsen met fyn vingers aan die seerkry van verwerping, die vlindergevoel van dalk-verlief-wees, en ook die groei wat dit bring om jouself en jou wêreld(e) te aanvaar. Met gemeenskapseie taalgebruik en kraakvars beskrywings kry die skrywer dit reg om die wêreld van Kieriekroek oop te sluit sodat dit vir die vreemdeling bekend en geliefd word. Zita is 'n boek wat deur enige jong (en ouer) leser gelees en baie geniet behoort te word.

Lapa Uitgewers ISBN 0 7993 37 12 9

Anneretha Combrink