20013-12


jongklomp

versfabriek

My lief... my valentyn

Hartklopper       

Ek sien 'n man wat fier
in die straat marsjeer;
Hy klop sjarmant
en ek loer deurie sleutelgat:

nee, wag -
dis maar net 'n seuntjie
wat, dadelik verveeld,
by ander huise toktokkie loop speel.

Jemima Meyer (16) 2013


Was jy ook al verlief?

Skryf 'n valentynsgedig;
'n gedig aan 'n geliefde;
'n onbeantwoorde liefde...

Gebruik die posbus en om jou gedig aan Storiewerf te stuur,
en wie weet...

Net jy       

Hoe beskryf ek die gevoel
niemand weet wat ek bedoel.
Ek kan dit nie beskryf
daai gevoel in my lyf.

As ek na die sterre kyk,
sien ek hoe jy lyk.
Sonder jou
kan ek nie aan hou.

Jy is my maan
dis waar die son ondergaan
Die gevoel hier binne my,
is absoluut net jy!

Danel Klopper (13) 2013

lynpyl

 

Kliphard       

'n Hart van klip is ongelooflik
hard en koud en onbekoorlik
maar wie kan tog 'n kliphart breek,
of met messe in sy maai in steek?
 
Nee, niemand kan dit doen nie,
klippe skrik nie vir 'n koue pampoen nie...
maar gee hom een skoot met die haelgeweer 
en jou klippie is vir ewig middeldeur
 
Ek dink my hart is van bloedrooi chappies 
want chappieharte sal nie breek nie 
jy kan hom kou en byt en trap en rek, 
daai kougomhartjie sal nie skeur nie.
 
En dan's die kwessie van die haelgeweer...
ag, jy kan my hart maar skiet -
want 'n hart van chappies plak altyd weer 
kougomharte gaan nooit tot niet.

Louise Leeuwner (16) 2013

lynpyl

 

Wat is die gevoel?       

Wat is die gevoel?
Is dit liefde?
Kan dit wees?
Die meisie met die ogies
met die wange
Kyk sy vir my?
Glimlag sy vir my?

Wat is die gevoel?
Gee sy so baie om?
Die meisie
met die hande so vol liefde
raak sy aan my?
Troos sy my?

Wat is die gevoel?
Is dit geluk?
Die meisie
met die goue hart
deel sy dit met my?
Pas sy myne so mooi op?

Dit moet wees
Ongevoelde liefde
ons gespreke woorde!

Ek's deurmekaar!
Ek's verlief
 
Ja, meisie
Ek's verlief op jou
Jou frommel neusie
Jou pragtige glimlag
Dis jou skuld
Vat verantwoordelikheid
En vertel almal
"Ek's syne"

Jan-Adriaan Swanepoel (18) 2012

lynpyl

In die geheim

Donker trippel tree
Vee my hart jou krummels op
Op op met trappies
Tot in jou druppels drome
Maar hier is donderwolk
Ons kruip weg
Agter jou gordyn
Soos kinders speel ons
Wag ons
Vir stukkies sonskyn glimlaggies
Want in die geheim
Is my hart
Joune

Alida du Toit (17) 2011

lynpyl

Tussenin

Iewers tussen die stof is jou spore,
iewers tussen gister en vandag is iets verlore.
Daar waar niemand kan sien nie, is jy nog altyd deel van my
Met my drome ry ek op die kruin,
in realiteit bly wag ek op die rooi duin.
Ek mis jou in gister en ek bly soek jou in vandag, want ek weet...
Iewers in die stof is jou spore,
iewers tussen gister en vandag is iets verlore!

Grace Boshoff (18) 2009

Om 'n draai en agter 'n klip
tussen die karavane en boompies fyn
Nou die mas, dan die seil van 'n skip
tussen alledaagse goed het jy verdwyn

Mika Stanvliet (16) 2008

Kom nou, Katriena,
ek is lief vir jou,
ek wil net
my arms om jou vou.

My naam is nie Katriena nie,
of Annie of Christine,
dis Adri, het jy vergeet?
Of wil jy dit sommer net weet?

Jy het my lief,
dit weet ek nou,
onthou net my pa noem my steeds Kindlief,
jy moet hom eers net asseblief vra.

Adri Brits (14) 2007

Die wind waai jou woorde

Die wind waai jou
woorde weg
dis die woorde wat gemaak is net
vir jou en vir my.
Ek onthou dit nog só goed
Jy aan my sy
Ek het gedink jy is gemaak net vir my.
Maar ek was verkeerd, so verkeerd.
Tog, hier staan jy voor my deur
Met 'n bos blomme van elke kleur.
Die liefde is terug. O, die liefde is terug.

Marié Roux (8 jaar)

Net vir jou

My darling, in my eie taal
vleg ek vir jou 'n rympie.
Jy's beautiful en al is jy nie maer
nie, fluister ek 'n klein geheimpie.

Jy's my sterretjie, my ewigheid.
As jy gaan sit
sak my son, en kom die lamheid
my maatjie, ek bid.

Ek bid vir jou en my.
Dis al wat ek jou vra
vergeet die ander lot en kry
jou feelings terug, sodat ek nie sorrow moet dra.

I love you my baby
as jy nie afrikaans verstaan
nie, ek weet, ek's die lady
jy's my son en my maan.

Kom terug na my toe,
vergeet al die ander
my baby, forget the prudes
kom na my toe, ek sal als verander.

Jou lewe
My lewe
My sexy
Come baby
I love you
My feelings is genuine
Ek belowe
Vat my, my darling
Ek is so oneindig lief vir jou.

Mika Stanvliet (15)

Jou veraaier
hartverdraaier
stekelwaaier
jou nikswerd stuk klei
hou net op om te speel met my
en moenie my hart deurmekaar brei!

Dalene de Vente (12)

Gediggie vir my liefling

Die oomblik wat ek jou gesien het, het ek geweet
(hoe dan anders? My hart klop nou nog!)
Met jou hare wat hang waar dit gehang het
en jou ongeskeerde baard wat
my wang so lekker gekrap het
en jou groot gestopte leerbaadjie
en nommer-dertien vastrap-stewels
wat jou so diep in my hart vasgestamp
het dat mens jou nie met 'n vice grip kan losmaak nie.

Die oomblik wat ek jou gesoen het, het ek besef
(hoe dan anders? My vel tintel nou nog!)
Jou mond het na Menthol-sigarette geproe -
al hou ek nie eintlik van die smaak nie -
en jy het na mán geruik,
en 'n koue aand
voor 'n warm kaggelvuur
en jou saggiesvat-growwe hand
wat my vingers so teer vasgehou het
dat ek van niks anders bewus was behalwe
hoe ongelooflik veilig ek by jou voel nie.

Die oomblik wat ek gesê het: "Ja," het ek agtergekom
(Hoe dan anders? Ek weet dit nou nog!)
dat jy onlosmaakbaar déél is
van my anatomiese bestaan,
dat jy onbereikbaar vér is die oomblik
wat ek ophou vertrou
dat jy my ridder
op jou swart-en-chrome ysterperd is,
dat jy my so gelukkig kan maak
dat ek nooit weer kan treur nie.

Die oomblik wat jy my die ring aan my vinger gesteek het, het ek verstaan
(hoe dan anders? EK dra hom nou nog!)
Dat jy my lief het maar
dat jy versekering nodig het
net
soos
ek.

Maryke Wenick (18)

Liefde

Wat is dit nou eintlik?
Om mekaar 'n drukkie te gee?
Om in stilte te wag dat hy oor jou hand vee?
Die liefde is 'n snaakse ding,
as jy HOM sien, begin jou hart wild rondspring
Jy hou aan wonder en dink
gaan hy dink jy's mooi en flink?
Hy sit agter in die klas
en as jy vir hom loer, vroetel hy met sy skooldas.
Jy glimlag maar moedig en mooi
en wonder of hy jou dalk vir die Valentynsdag gaan nooi?

Tiané Goosen (15)

Ek lê wakker oor jou

Ek lê wakker oor jou
want ek wag vir jou oproep
want ek luister na jou stem
op my voicemail
want ek lees weer jou sms
en ek onthou jou sterk hand
wat my vashou

Ek lê wakker
want ek is bang ek vind jou nie in my drome nie

Talita Theron (16)

Hart, my hart jou lawwe ding
wie's dit wat jou so laat bons en spring?
Kom terug hart, klim terug in
jy's myne hart niemand anders s'n.
Wanneer gee ek jou weg?
Ek wag vir Meneer Reg en dan eers
dan eers gee ek jou weg.

Crisna de Beer

Hy is soos my Pick and Pay
Jou lippe is koud, as ek daaraan raak voel ek stout.
Jou oë is so bruin soos die donkerste nag!
Dit sneeu en reën as jy vir my glimlag!
Jou persoonlikheid blink soos sterre in die donkerste nag!
Soos sjokolade, so is jou liefde soet,
as ek wil opgee gee jy my moed!
Jy laat my hart klop,
as ons liefde 'n toets was het ek al lankal gedop!
Jy was nog altyd daar langs aan my sy,
jy was nog altyd my Pick and Pay,
waar ek al my nodige goed vandaan kry!

Amereza (13)

Ambivalensie

Ek
wonder en verlang,

ma' as ek die
bitter herinnerings

ruik,

weet ek
dat
lewe

sonder jou
salig, sónlig

soet

en veerlig is

Khándi Jacquin

Dis jy!

Dis jy wat my hart vinniger laat klop as jy aan my hand raak.
Dis jy wat laatnag sms en sê, "Ek mis jou."
Dis jy wat my aanvaar, net soos ek is.
Dis jy wat my lief het.
En dis jy wat my in liefde laat glo

Yolanda Nel (18)



'n Leeftyd vir jou

Jy bring vir my 'n rankroos
sodat dit my hart se mure toerank
Dat ek elke dag 'n roos kan pluk
en weet jy het my lief.

Jy stuur vir my 'n rooiborslaksman
sodat sy karmosynbors jou liefde uitglinster
Dat ek elke dag sy roep kan hoor
en weet jy is naby.

Jy gee vir my 'n liedjie
sodat die note my siel na jou stuur.
Dat ek elke dag jou stem kan hoor
en weet jy is my sielsgenoot.

Ek stuur vir jou 'n leeftyd
waarin jy my kan liefhê,
waarin jy naby kan wees,
waarin jy my sielsgenoot is
Waarin ons harte in mekaar vleg
en ons siele saamsmelt.

Rulien Grobler (15)



As jy...

As jy vanaand in jou bed klim
en jou gebed doen,
dink 'n oomblik aan my
bid 'n oomblik lank vir my.

As jy die komberse om jou trek
en jou oë sluit,
sien my gesig vir 'n oomblik
onthou my 'n omblik.

As jy wegsink in jou droomwêreld
en begin droom,
sien, voel, ruik my 'n oomblik in jou drome
laat ek daar wees vir 'n oomblik.

Want al hierdie oomblikke
dink ek aan jou,
droom ek van jou,
Sien ek jou, ruik ek jou,
voel ek jou.

Hermien van Leewen (17)



vir jou pluk ek 'n witter blom
wat in soetheid versprei alom
soos tye wat jy huistoe kom
vir jou pluk ek 'n witter blom
'n rooier blom wat mooier blom
'n bonter-bossie-blomme-blom
vir jou pluk ek 'n witter blom
gedagtig in jou: lewend blom

*

Eet 'n halwe arbei ekke: die anner jy.
Laat ek in jou oë kyk en jy in die van my.
Kom ons dans die nag verby.
Kom ons ry na blouberge vêr en vriende naby.
Kom ons vaar in 'n boot op die Suid-Kaap-see.
Met Tafelberg se plat gedek: aandete vir twee
hoop ek jy gaan sê dat ek jou vir altyd kan kry
maar as jy nogie willie: wees 14 Februarie vry.

*

toe jy laasjaar die deur tussen ons toemaak en vergeet
kon ek hoor hoe jou redes die sleutel in die slot afbreek
vir lank het ek deur daardie sleutelgat probeer smeek
eintlik net in die gewoonte van saamwees verledes geleef
maar die een agter 'n soppy afskeidsbrief het ek vergeet
:gevorderde valentynsdag aan jou my lief (en leed)

Gert Cornelissen



Vakansieherinneringe

Ek bou ‘n sandkasteel
Met drome en gedagtes
Ek voer dit uit met woorde
En lê ons liefde daarin neer
*
Ek het jou liewer as al die sterre in die see
en die sand in die lug
Want jy keer my wêreld om
en maak my nuut
*
Die grou weer reën teen die ruit
en loop in straaltjies trane teen die glas
Ek mis jou vanaand…
Jou warm asem en jou sagte mond

Marsunet Scholtz (18)



winterkwatryne

die loodkruid
is poeierblou en sag -
ek sit daarby
want dit ruik na jou lag
*
elke boom
se krom arms lê ontbloot
- dit omhels my-
dit ruik na dood
*
jy is die bittersoet koffiesmaak
wat die eerste koppie in my mond kom maak
jy is die sesuuroggend se donker lig
wat sku voor die son se strale vlug
*
my dag bestaan
uit die son wat rus
in die donkerblou bal
wat jou iris is
*
ek ruik jou reuk van suurlemoen
en wil jou langs my hê
soos ons in 'n vervloë droom
sy aan sy sou lê

Hanta van Rooyen (20)



Jou blouselblou oë
en blonde kuif
Jou glimlag wanneer jy vir my wuif
'n drukkie, warm en sag
jou vriendelike lag

Anoniem



Valentynsrympie

Jy's my Valentyntjie
en ek jou proefkonyntjie!
Jy's my hart-se-punt
jy laat my dag so mooi begint!
Ek weet nie of jy weet nie
of het jy al vergeet nie:
Die liefdesdag kom nader
weer sê ek : Dankie Vader!

Elizabeth Kendall



Gedig van ons

ek wou vir jou
'n gedig skryf
maar ek kon nie

ek het probeer
om die kleur
van jou oë te onthou
maar my gedagtes was grys
soos die sementdam
waarin ons twee altyd geswem het

ek het probeer
om die klank
van jou stem te onthou
maar my brein was donker
soos die reënwolke buite
terwyl ons twee saam pannekoek gebak het

ek het probeer
om die warmte
van jou glimlag te onthou
maar my kop was leeg
soos die soetkoekieblik
waaroor my ma altyd geraas het

jou beeld vervaag
elke dag meer
maar ons herinneringe
sal ek altyd onthou
maak nie saak hoe donker
dit geëindig het nie

Marsunet Scholtz (17)



Diep donker dans

In die nag van ons eensaamheid
ruik jou arms na wierook
en my oë brand gate in 'n
kolkende son wat donker skyn
swartgatnova verwonder jy my
hoof, begroet my vrae met kus
op kus; daaraan gewoond skep
jy emmers water uit my weemoed
sewe dae sluit wentelbaan as
jyek koets opsaal en deur die
bloulug jaag sy aan sy
jyekenjy
daar waar die engele vakansie hou
skuur ons wiele verby, vrek 'n
gebrek aan siekte. haal parmantig
twee djembe's uit en klokkelok
ritmies teen die grein van klank
en wispelturigheid soos twee
kerklokke myle aaneen elke
lugruim deurklief met herinnering
hê my lief en doen nou 'n
diep donker dans
klokkelok

Alwyn van Zijl

Terug na Versfabriek

 

 

 

 


Voordeur en inhoud | Jong woordvrate | Ouer woordvrate | e-pos

STORIEWERF word aangebied saam met woordvrate en storiemakers
van alle soorte en groottes.

Gebou en onderhou deur Franci Greyling.

Skryfkuns Skool vir Tale Noordwes-Universiteit (PUK)

(C) Franci Greyling 2000-2014